Governadór BCTL, Abraão de Vasconcelos. Imajen Tatoli/Egas Cristovão

DILI, 10 agostu 2020 (TATOLI)-Programa moratóriu kréditu nu’udar programa husi pakote ekonómiku ne’ebé mak Governu liuhosi desizaun Konsellu Ministru aprova iha ámbitu implementasaun períodu Estadu Emerjénsia relasiona ho surtu COVID-19 iha Timor-Leste.

Implementadór ba programa moratóriu kréditu mak Banco Central Timor-Leste (BCTL), ne’ebé asina ona akordu ho Governu liuhosi Ministériu Koordenadór Asuntu Ekonómia (MKAE) no Ministériu Finansa (MF) hodi implementa programa ne’e.

Programa ne’e aplika ba sira ne’ebé foti kréditu antes loron 01 marsu 2020 no ba sira ne’ebé foti kréditu iha 11 marsu 2020 to’o agora la elijível, no ninia aplikasaun sei vale durante fulan-tolu, hahú husi agostu, setembru no outubru 2020.

Ba kestaun ne’e, Governadór BCTL, Abrãao de Vasconselos, hateten prosesu rejistrasaun ba programa ne’e taka ona iha loron 31 jullu no prolonga to’o loron 05 agostu, no banku komersiál sira mós partilla ona informasaun ba kliente sira ne’ebé partisipa ba programa.

Daudaun ne’e, BCTL simu ona lista husi banku sira no tuir planu iha inísiu setembru 2020, BCTL sei fó sai naran benefisiáriu ba programa moratóriu kréditu, maibé seidauk bele fó sai númeru benefisiáriu.

“Ha’u prefere seidauk ko’alia númeru rekerente sira, maski sistema ne’e real time no ami hatene dadus sira, maibé hafoin iha setembru maka bele BCTL públika relatóriu preliminár ida kona-ba implementasaun programa ida-ne’e,” tenik Governadór BCTL, foin lalais ne’e ba Agência Tatoli, iha ninia knaar fatin, Akait, Dili.

Antes ne’e, Prezidenti Repúblika, Francisco Guterres ‘Lú Olo’ promulga ona Dekretu-Lei atu Estadu fó apoiu finanseiru selu porsentu 60 osan-funan ba sidadaun ida-idak, organizasaun koletiva, no emprezáriu ne’ebé halo kréditu ba finansiadór sira (banku ka instituisaun finanseira).

Dekretu-Lei ne’e hateten, ema, organizasaun ka empreza ne’ebé iha kréditu sei selu de’it osan-funan porsentu 40 ba finansiadór ne’ebé fornese empréstimu.

Estadu Timor-Leste sei selu osan-funan porsentu 60 ba finansiadór ne’ebé fornese kréditu ba sidadaun ho nasionalidade timor-oan, organizasaun koletiva lahó orientasaun lukrutiva ho sede iha Timor-Leste, emprezáriu komersiál individuál nia-naran no empreza rejistada.

Bazeia ba Dekretu-Lei ne’e, programa moratóriu kréditu la aplikável ba atividade telekomunikasaun, industriál estrativa no servisu finanseiru.

Governadór BCTL dehan, programa moratóriu kréditu hanesan inisiativa ne’ebé mak Governu Timor-Leste inisia no programa ne’e ninia dezeñu desde marsu 2020 durante implementasaun Estadu Emejénsia, ne’ebé iha juñu maka ninia enkuadramentu jurídiku ne’e kompleta no Prezidente Repúblika promulga iha inísiu juñu.

“Moratóriu ne’e signifika hapara provizóriu ema-nia ansuran funan, ida-ne’e maka bolu moratóriu kréditu, maibé iha programa ne’ebé maka Governu aprova ne’e atu hapara pagamentu prinsipál durante fulan-tolu. Implementa hotu maka banku sira haree pedidu husi rekerente sira no barak tebes maka hakarak partisipa,” nia akresenta.

Semana rua tan, BCTL bele hatene ona númeru loloos aplikante hira mak partisipa tanba ema balun submete aplikasaun dala-rua to’o dala-hitu.

Kliente balun deside lakohi partisipa

Dirijente Banku Sentrál ne’e informa katak ba programa moratóriu kréditu ne’e, iha kliente ka empreza balun maka lakohi partisipa ho razaun lakohi estende ninia períodu tempu selu kréditu tanba bele aumenta tan ba fulan-tolu.

“Empreza balun deside lakohi partisipa tanba programa ne’e hapara pagamentu prinsipál durante fulan-tolu, maibé ninia períodu tempu selu kréditu aumenta tan ba fulan-tolu atu konpensa hapara pagamentu ne’e,” Abrãao de Vasconselos akresenta.

Iha mós kliente balun lakohi partisipa programa ne’e tanba sira-nia kréditu atu besik ramata iha setembru ka novembru, maibé tanba tuir programa moratóriu kréditu maka tenke hotu fali iha fevereiru.

“Vantajen depende ba situasaun finanseiru, ezemplu kliente ida kada fulan ninia pagamentu ba kréditu $100 ba prinsipál no ninia funan $10, entaun kuandu nia la partisipa programa ne’e kada fulan nia tenke selu ba banku $110, maibé kuandu partisipa maka $100 ne’e la selu, maibé selu de’it ninia funan ho porsentu 40 hosi $10, ne’ebé kada fulan nia selu de’it $4. Durante fulan-tolu nia iha hela $300, maibé la signifika $300 ne’e Governu selu ona, ne’e lae. Ida ne’e adia de’it kuandu kréditu ne’e hotu iha dezembru, maka aumenta tan fulan-tolu atu permite nia selu ansuran ida nia la selu. Programa ne’e funsiona hanesan ne’e, tanba ne’e kliente balun hanoin katak di’ak liu la partisipa,” nia esplika.

Maski nune’e, Governadór BCTL afirma katak programa ne’e la’os obrigatóriu maibé loke ba sé de’it maka atu aplika.

Aplikasaun via online

Programa moratóriu kréditu aplika ba individu no empreza kualkér timor-oan, ne’ebé maka hakarak atu partisipa, timor-oan sé de’it hanesan funsionáriu públiku no funsionáriu iha setór privadu sira ne’ebé mak iha kréditu.

Programa ne’e vale ba ema sira ne’ebé iha ona kréditu, tanba Governu hakarak fasilita atu hamenus todan durante fulan-tolu.

“Kona-ba aplikasaun via online, ami haree maioria kréditu sira individu iha banku komersiál pelu menus banku haat ne’ebé mak partisipa maioria no maioria aplikante hanesan funsionáriu públiku, membru FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL) no instituisaun Estadu, katak maioria ema sira foti kréditu hanesan serbisu-nain. Aplikasaun online ne’e kuaze simples, la’ós dezeña hanesan buat ida defísil tebes atu ema priense, maibé ninia mata-dalan ne’e iha hotu iha kada kuluna no ninia ezemplu inklui  esplikasaun klaru hodi ajuda ema priense,” nia informa.

Tuir Abrãao, parte Banku Sentrál hakarak uza meiu online atu bele haree komentáriu públiku, ne’ebé dalabarak fó hanoin katak BCTL kria sistema ne’ebé difikulta kliente hodi asesu.

“Importante mak objetivu planu dezenvolvimentu nasionál no Governu ninia planu bele promove dijitalizasaun no promove Timor-Leste ne’e sai modernu liu. Ida-ne’e parte ida atu aprende prosesu,” nia akesenta.

Realidade kuandu aplikante sira la kompriende sira bele hakat ba BCTL hodi husu informasaun no funsionáriu sira sempre ajuda bainhira kliente la hatene priense aplikasaun.

Banku haat mak partisipa programa moratóriu kréditu

Hafoin BCTL hahú implementa programa moratóriu kréditu, banku komersiál haat hanesan Banku Nasionál Komérsiu Timor-Leste (BNCTL, sigla portugés), Banku Mandiri, BRI, no BNU hahú partisipa.

“Bainhira dezeña programa ne’e iha inísiu, BCTL envolve instituisaun finanseira no mikro finanseira sira hotu. Iha banku lima no mikro finanseira hanesan Moris rasik no Kaebauk, maibé tanba programa ne’e la’os mandatóriu maka banku ANZ deside la partisipa tanba sira mós iha programa hanesan,” nia haktuir.

Enkuantu mikro finanseira hanesan Moris Rasik no Kaebauk, bainhira atu implementa sira deside  la partisipa tanba sira mós iha programa moratóriu.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here