Ilas Santo Antonio sai hosi portaun boot igreja parokia Santo Antonio Baucau hodi halo prosisaun ba vizita Suku Buibau. Imajen/Kontribuidór: Cardoso Sarmento

DILI, 11 agostu 2020 (TATOLI)–Pároku Parókia Santo António Baucau, Pe. Manuel da Silva Ximenes, SDB, hateten, ohin, ilas Santo António de Padua ne’ebé sai mahein (pedrueiru) ba igreja parokia Baucau sei vizita sarani sira iha Suku Buibau hodi kontinua hametin sarani sira-nia fiar ba Maromak.

Notísia Relevante: Kompetisaun marxa moradores prezerva identidade kulturál

Pároku Manuel Ximenes hatutan, iha tinan ne’e tuir loloos selebra festa Santo António iha loron 13 juñu maibé tanba insidente ho Santo António nia loron moris ba dala-825 (15 agostu 1195-15 agostu 2020) entaun parókia deside hodi selebra Santo Antonio ninia loron moris nian.

Tanba ne’e, Manuel Ximenes informa, iha oprtunidade ida-ne’e nia organiza oportunidade espirituál hodi lori ilás Santo António ba vizita sarani sira iha sentru Buibau hodi halakon espresaun negativu ba komunidade Baucau hanesan “muturabu” ne’e ba fali “muturau” tanba hosi selebrasaun ne’e sarani sira manifesta sira-nia fiar nu’udar sarani laran di’ak no laran luak.

“Ohin, ilas Santo António de Padua ne’ebé sai mahein (pedrueiru) ba igreja parokia Baucau sei vizita sarani sira iha Suku Buibau hodi kontinua hametin sarani sira-nia fiar ba Maromak. Ha’u hanoin, loos duni katak iha fatin-fatin ema sempre fó espresaun negativu ba komunidade Baucau ne’e dehan Baucau oan sira-ne’e mesak ema ‘muturabu’ tantanan de’it. Maibé, ha’u hanoin parte ida Baucau oan sira la’os ‘muturabu’ de’it maibé sira mós ema ‘muturau’ (laran di’ak). Katak Baucau oan sira mós hatene sira-aan no tau sira-nia aan ba momentu ne’ebé ita selebra fiar sarani nian nu’udar sarani laran di’ak,” dehan Pároku Parókia Santo António Baucau, Pe. Manuel da Silva Ximenes, SDB, ba Agência TATOLI liuhosi telefonika, tersa ne’e.

Manuel Ximeenes hateten, liuhosi ilás Santo António nia prezensa bele hametin Baucau-oan sira-nia fiar, atu Baucau-oan sira harohan no hahí ba Maromak liuhosi Santo António hodi bele haraik estabilidade, unidade, no pás ba sira sira ida-idak nia aan, ba sira-nia família, no sosiedade tomak.

Pároku parókia Baucau, Pe. Manue da Silva Ximene, ho autoridade lokál Baucau hiit ilas Santo António iha kbaas leten. Imajen/Kontribuidór: Cardoso Sarmento

“Ha’u laiha dúvida no latauk, ohin, ilas Santo António sai ba sira-nia fatin (Buibau). Maski ema-nia intensaun kloot maibé tuir ha’u-nia haree katak sarani no joven ida-idak sei buka komprende di’ak liután kona-ba sira-nia dever nu’udar sarani. Ohin, ilas Santo António sai hosi parókia sei ba sira-nia sentru ne’e, hodi halibur sarani sira hamutuk no hametin sira-nia fiar unidade, nu’udar sarani, timoroan liuliu Buibau no Baucau-oan iha rai Timor Leste,” nia dehan iha ambitu reinaugurasaun Igreja Santo Antonio Baucau iha loron 15 agostu.  

Amu pároku parókia Santo António hateten, ohin, prosisaun ba ilas Santo Antonio ne’e hahú hosi Igreja Santo Antonio Baucau Vila tuan no sarani sira hosi Buibau no sarani sira hosi Fatumaca de Cima hosi Gariuai, Wailili, Samalari no Buibau sei simu ilas Santo António iha Samadigara hafoin lori liu ba Vela-Vista no iha loron 13 agostu lokraik sei lori hikas ilas Santo Antonio ba igreja Parólia Santo Antonio Baucau.

Nia dehan, antes ne’e iha 2018 ilás Santo António hala’o vizita ba Suku Samalari, iha tinan 2019 vizita ba iha Suku Gariwai, tinan ida-ne’e vizita Suku Buibau, tinan oin sei vizita fali Suku Wailili no ilás Santo António sei vizita hotu ba sentru sira ne’ebé ba pertense ba Parókia Santo António Baucau nian.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here