Tropa moradores hosi Fatumaca de Cima Dom Bosco Gariuai. Imajen/Foti hosi kintribuidór: Agostinho Ornai “Maubutil” Ximenes.

DILI, 08 agostu 2010 (TATOLI)—Iha Sidade tuan Baucau kulugisa fatuk-laran, ohin (sábadu, 08 agostu 2020) dadeersan, nakonu ho tropa ka moradores tradsionál be hatais hena tradisionál (tais) ho kór oin-oin forma iha lurón (estrada) klaran hanesan atu halo funu boot ida. Balun ain-tanan no balun kalsu netik sira-nia ain ho sapatu.

Tropa moradores sira ne’e mai hosi suku oin-oin. Sira kabala tais. Kesi hena mutin iha knotak. Hena mean no hena kinur kesi iba ulun. Sira hatais hanesan lia-na’in sira atu halo serimónia kulturál ruma. Lori bandeira RDTL no bandeira vatikanu iha sira-nia liman. Sira baku tambor no hakat tuir tambor nia rítmu ho rítmu ida de’it. Hakar ba oin, balun huu korneta be nia lian atu hanesan bolu anju sira iha lalehan atu tun mai rai.

Korneta no tambor nia lian be kmanek, halo populasaun sira iha Sidade Baucau, hatudu oin midar. Sira hamriik iha estrada ninin hodi haree tropa (pasukan) moradores tradisionál sira be hakat ho rítmu ida. Sira hakat tuir tambor no korneta nia lian be lian haksesuk malu, halo populasaun sira ne’e konfuzaun.

Imajen/Hosi kintribuidór: Agostinho Ornai “Maubutil” Ximenes.

Saida mak akontese iha loron ida ohin? Tropa moradores tradisionál sira-ne’e mai hosi ne’ebé? Sira, forma iha dalan, atu simu bainaka importante ruma atu vizita rai Baucau? Lae! Afinál tropa moradores tradisoná hirak ne’e, tuir hela kompetisaun marxa moradores iha Parokia Koronel Santo Antonio de Padua Baucau. Kompetisaun ida-ne’e hala’o tanba inisiativa hosi Pároko Pe. Manuel Ximenes, SDB, no Konsellu Párokia sira, iha ámbitu reinaugurasaun Igreja Santo Antonio Baucau iha loron 15 fulan agostu ho objetivu atu promove kultura ida-ne’e sai hanesan Timor-Leste nia identidade.

“Ami halo kompetisaun ne’e tanba ami hakarak prezerva identidade kulturál. Marxa moradores nu’udar identidade kulturál, ita presiza asegura liuhosi kompetisaun. Kompetisaun ne’ebé ami hala’o, ami fó oportunidade ba de’it jerasaun foun ho idade eskola primaria no pre-primaria nian,” dehan Prezidente Komisaun Organizadora, Luis Aparicio, ba Agência TATOLI liuhosi WA, sábadu ne’e.

Luis Aparicio informa, kompetisaun marxa moradores ne’e partisipa hosi tropa (pasukan) moradores sira hosi suku Suku Gariuai, Suku Wailili, Suku Bucoli no Suku Buruma, Postu Administrativu Baucau Vila, Munisípiu Baucau.

Nia hateten, ekipa juri ne’ebé komisaun organizadora fó fiar hodi halo avaliasaun ba kompetisaun refere mak hanesan Xefe Kultura Munisípiu Baucau, Avelino Gaio, hanesan prezidente juri ho membru na’in rua (2) hanesan Aleixo Ximenes no Julio Peloi. Ekipa juri fó avaliasaun bazea ba kritéria sira ne’ebé komisaun organizadora sira prepara.

Xefe Suku Gariuai, Arlindo Marcal, no Treinadór Tropa Moradores hosi Fatumaca de Cima Dom Bosco Gariuai, Manuel Freitas, hamutuk ho nia membru sira. Imajen/Foti hosi Facebook: Gari Uai.

Entretantu, Xefe Suku Gariuai, Arlindo Marcal, ne’ebé akompaña tropa moradores hosi Fatumaca de Cima Dom Bosco Gariuai ne’e, hateten nia parte sente haksolok tanba bele lori ninia tropa moradores ne’ebé mesak labarik hodi bele kompete ho tropa moradores hosi suku seluk iha Baucau. Manan ka lakon, nia dehan, ne’e la’os kestaun maibé importante mak lori labarik no jerasaun foun sira tuir kompetisaun ne’e hodi bele promove kultura ne’e atu labele mate iha loron aban.

“Ba ha’u manan ka lakon ne’e la’os kestaun. Importante mak ami mai tuir kompetisaun. Ha’u-nia tropa moradores sira ne’e mesak labarik de’it. Ohin, ha’u haree ha’u-nia labarik sira halo sala uitoan tanba sira-nia mental mak laiha. Maibé, ba ami, importante mak ami-nia partisipasaun ne’e hanesan parte ida hosi promove kultura no prezerva identidade kulturál atu nune’e ba oin ne’e, marxa moradores ne’e labele lakon no labele mate,” dehan Xefe Suku Gariuai, Arlindo Marcal, ba Agência TATOLI liuhosi telefonika, sábadu ne’e.

Imajen hosi kintribuidór: Agostinho Ornai “Maubutil” Ximenes.

Iha biban hanesan, treinadór Tropa Moradores Fatumaca de Cima Dom Bosco Gariuai, Manuel Freitas, rekuñese katak ninia membru tropa moradores sira konsege halo sala iha ekipa juri nia oin tanba labarik sira lakon konsentrasaun no lakon mental. Nia rekuñese ida ne’e tanba prosesu preparasaun no treinamentu ba labarik sira-ne’e la’o semana rua de’it no ptreparasaun ladún másimu.

“Maski preparasaun ladún másimu maibé iha kompetisaun ohin ne’e, ami bele hetan terseiru lugar. Ida-ne’e, ba ha’u, nu’udra treinador ha’u sente kontente tebes. Iha kompteisaun ohin ne’e, primeiru lugar okupa hosi Suku Bucoli no Suku Wailili mak sai segundu lugar. Ba oin, se iha tan kompetisaun hanesan, ami sei prepara di’ak liután,” nia haktuir.

Atu simu prémiu, Treinador Manuel Freitas haktuir, iha sesta-feira loron 14 fulan agostu lorokraik, manan-na’in sira sei fila hikas ba Párokia Santo Antonio Baucau hodi bele simu sira-nia prémiu no sira sei hamutuk ho sarani sira iha selebrasaun reinaugurasaun Igreja Parokia Santo Antonio Baucau iha sábadu loron 15 fulan agostu 2020.

Jornalista  : Cancio Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here