Sesaun Plenária Iha Parlamentu Nasionál. Imajen /Egas Cristovão

DILI, 11 agostu 2020 (TATOLI)—Parlamentu Nasionál (PN) kontinua preokupa Governu nia kapasidade ba ezekuta fundu COVID-19 ne’ebé antes ne’e aprovadu ona hosi uma fukun maibé ezekusaun seidauk atinje metas ne’ebé mak iha.

Notísia Relevante: Ohin, PN halo votu konfirmasaun ba deklarasaun EE

Deputada Bankada CNRT, Maria Fernanda Lay, preokupa ho Ministériu Saúde tanba parlamentu aprova osan iha fulan-abríl no agora iha hela kustu.

“Ha’u deteta katak ezekusaun fundu COVID-19 kiik. Ha’u preokupa tanba laboratóriu nasionál uza mákina manuál hodi halo teste amostra, ne’e preokupante. Se iha país Austrália ho Indonézia sa’e maka’as, ita-nia ekipamentu sira-ne’ebé ita hameno ne’e iha ne’ebé. Klaru katak parlamentu aprova osan kiik ka boot, ne’e osan povu nian, ne’e ami tenke kestiona,” Deputadu Maria Fernanda Lay levanta liuhosi deskusaun konfirmasaun deklarasaun Estadu Emerjénsia, iha plenária estraordinária, tersa ne’e.

Aleinde ne’e, Deputada Maria Fernanda Lay preokupa ho otél ne’ebé aluga durante aplikasaun Estadu Emerjénsia tanba to’o agora laiha informasaun hosi Governu.

“Relatóriu ezekusaun parlamentu la simu no ami la hatene,” Deputada Bankada CNRT ne’e hateten.

Entretantu, Vise-Xefe Bankada PLP, Deputadu Francisco Vasconcelos, sekunda deklarasaun Deputada Maria Fernanda Lay nian tanba pertinente.

“Ha’u sekunda deklarasaun Deputada Maria Fernanda Lay nian tanba pertinente. Ha’u hanoin kestaun ne’e ha’u husu señor Primeiru-Ministru atu haree situasaun ne’e,” nia dehan. 

Deputada Bankada CNRT, Carmelita Caetano Moniz mós preokupa situasaun ne’e tanba to’o agora ekipa liña-frente barak mak seidauk simu sumplementu remuneratóriu.

“Ezekusaun orsamentu COVID-19 nian oinsá. Millaun $5 ne’ebé ita haruka ba UNDP sasán sira-ne’e to’o mai ona ka lae. Ninia fasilidade oinsá, fasilidade ba kuarentena no mós izolamentu,” nia hateten. 

Iha parte seluk, Deputada Bankada CNRT, Bendita Magno preokupadu ho ezekusaun orsamentu fundu COVID-19 nian tanba parlamentu aprova pedidu ne’e prevee espesífiku maibé to’o agora ezekusaun orsamentál kontinua sai problema boot.

“Ekipa liña-frente ne’ebé servisu iha fronteira ne’ebá nein simu osan, pedidu levantamentu ne’ebé ami aprova tutuir malu ba ne’ebé,” nia kestiona. 

Deputada FRETILIN, Maria Angélica Rangel, agradese Governu ne’ebé oras ne’e halo prevensaun hasoru surtu COVID-19. Nia hatutan, iha Estadu Emerjénsia ida-ne’e tanba moras ne’ebé afeta mai Timor-Leste.

Nia sujere sujere atu halo vijilánsia iha fronteira hanesan Suai, Bobonaro no Oé-Cusse tanba moras ne’e importadu.

“Ha’u-nia pergunta mak ne’e. Ba Ministériu Saúde, Ministériu Finansa no Ministériu Negósiu Estranjeiru no Kooperasaun (MNEK) katak ita sei iha osan ka lae hodi sustenta Estadu Emerjénsia ne’e. Tanba depois ami halo levantamentu seidauk atinje metas no ninia ezekusaun 48 %, ida-ne’e ami preokupa. Agora Prezidente Repúblika dekreta tiha ona Estadu Emerjénsia, saida mak ita halo, osan iha ka lae atu responde loron 30 ne’e iha ka lae,” nia dehan.

Entretantu Deputada Bankada CNRT, Virgínia Ana Belo, preokupa ho desizaun Governu ne’ebé desmantela tiha Sentru Integradu no Jestaun Krize (CIGC-sigla portugés) tanba moras ne’e sei kontinua.

Reprezentante povu sira preokupa tanba pedidu levantamtamentu dahuluk ho montante millaun $150 no levantamentu daruak ho montante millaun $70 maibé ezekusaun foin atinje 48%.

Notísia Relevante: PN Preokupa Kapasidade Governu Ezekuta Fundu COVID-19

Jornalista : Evaristo Soares Martins

Editór       :  Cancio Ximenes

1 KOMENTÁRIU

  1. Ezekusaun foin atinji 48%, tanba Ministeriu balun budu hela transferensia ba pesoal sira nebe momentu aprova.
    Ezemplu kiik mak ezekusaun osan covid ba jornalista ate data sidauk simu.

HAKEREK NO HATÁN

Please enter your comment!
Please enter your name here