Segundu Komandante Polísia Munisípiu Dili, Superintendente Asistente Xefe, Euclides Belo. Imajen Tatoli/Antonio Goncalves

DILI, 10 agostu 2020 (TATOLI)- Komandu Polísia Munisípiu Dili koordena ho Autoridade Munisípiu Dili kontinua halo kontrolu másimu ba populasaun kapitál Dili atu kumpre nafatin regra Estadu Emerjénsia (EE) dahaat nian hodi lori sosiedade prevene husi  propagasaun surtu Coronavirus ka COVID-19.

Notísia Relevante : PR Lú Olo: “Renovasaun Estadu Emerjénsia Atu Salva Povu”

Segundu Komandante PNTL Munisípiu Dili, Superindente Euclides Belo, deklara katak, PNTL halo nafatin operasaun iha tempu kalan no loron hodi sosializa informasaun ba povu halo atividade kontinua nafatin uza máskara no fase-liman beibeik no kontrolu distánsia sosiál.

Nia dehan, Komandu PNTL mós servisu hamutuk ho ekipa Ministériu Saúde fahe nafatin máskara ba sosiedade sira, inklui estudante sekundáriu no universitáriu sira iha kapitál Dili.

“Komandu PNTL Dili liuhusi meius operasionál Servisu Tránzitu Rodoviáriu, Ofisiál Polísia Suku (OPS) hodi alerta nafatin ba sosiedade labele alerjia utiliza máskara, fase-liman beibeik  no kontrola regra distánsia sosiál para ita prevene-an husi COVID-19,” dehan Euclides ba jornalista iha Komandu PNTL, Caicoli, Dili.

Ba públiku sira ne’ebé uza motór no karreta halo movimentu tenke uza máskara no fase-liman beibeik bainhira halo atividade kompras sasán iha merkadu no loja sira.

Nia hatutan, ba abitante sira ne’ebé ulun toos la kumpre regra saúde nian, Komandu PNTL sei halo asaun tuir lei.

“Ita hotu- hotu tenke koopera malu para luta kontra COVID-19 iha ita-nia rain,” nia apela.

Iha parte seluk, PNTL Dili mós halo apreensaun meza ba jogu bola guling inklui hapara atividade festa balun iha bairru balun hodi kumpre regra EE.

“Ita prende mós objetu bola guling inklui osan no ami alerta mós ba atividade festa sira ne’e tenke para lai, tanba ita tenke kumprimenta hodi kumpre regra Estadu Emerjénsia para ita evita-an husi ameasa COVID-19,” nia hateten.

Daudaun ne’e Timor-Leste rejista pasiente estranjeiru ida mak pozitivu COVID-19 hala’o hela tratamentu saúde iha fatin izolamentu, Sentru Saúde Vera Krús, Dili.

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here