Komandante Jerál PNTL, Komisáriu Faustino da Costa. Imajen Tatoli/António Gonçalves

DILI, 18 juñu 2020 (TATOLI)–Komandante Jerál Polísia Nasionál Timor Leste (PNTL), Komisáriu Faustino da Costa hateten, Unidade Patrulamentu Fronteira (UPF) sei kontinua asegura fronteira terestre iha kualkér situasaun.

Notísia Relevante: Autoridade Seguransa Detein Sidadaun Na’in-Haat iha Fronteira

Faustino deklara asuntu ne’e hodi responde jornalista sira nian, ne’ebé dehan, oinsa servisu UPF nian iha fronteira, bainhira governu la estende tan Estadu Emerjénsia.

“Sira-nia servisu iha fronteira la’o nafatin, tanba sira tenke kontinua asegura nasaun. Atu dehan katak, Indonézia agora laiha ona estadu emerjénsia. Maibé, sira iha hela faze avaliasaun no faze tranzisaun ida. Informasaun ne’e ita hetan hosi ita-nia ofisiál superiór ne’ebé koloka iha ne’eba, nia sempre informa situasaun hotu iha ne’eba mai ita,” dehan Faustino da Costa hodi hatan ba  jornalista sira nia preokupasaun kona-ba oinsa servisu UPF nian iha fronteira bainhira Governu la estende tan Estadu Emerjénsia, hafoin hal’o enkontru semanál ho Prezidente Repúblika, Francisco Guterres Lú-Olo, iha Palásiu Prezidensiál, Bairru Pite, Dili, kinta ne’e.

Faustino hateten, surtu COVID-19 iha Indonézia númeru sa’e hela de’it maibé estadu emerjénsia iha Indonézia laiha ona. Tanba ne’e, nia dehan, fronteira terrestre ne’e sai hanesan foku prinsipál atu kontinua asegura, nune’e evita movimentu illegal ne’ebé lori risku mai Timor-Leste. 

Oras ne’e daudaun, tuir nia, Timor-Leste iha hela Estadu Emerejénsia (EE) datoluk ne’ebé Prezidente Repúblika dekreta hahú hosi  loron 28 fulan Maiu to’o 26 fulan Juñu 2020, no estadu Timor-Leste konsege halo prevensaun ba COVID-19 ne’ebé TL livre ona hosi kazu pozitivu hamutuk 24.

Tuir European Centre for Disease Prevention and Control (ECDC), fó sai katak, to’o ohin loron 18 fulan juñu 2020, mundialmente kazu COVID-19 hamutuk 8.418.601 ho númeru mate  451.672  no rekoperadu hamutuk 4.430.887.

Aleinde ne’e, kazu Covid-19 iha nasaun viziñu Indonézia kazu konfirmadu hamutuk 41.431, rekoperadu 16.243 no mate hamutuk 2.276.

Jornalista : Cipriano Colo

Editór       :   Cancio Ximenes

HAKEREK NO HATÁN

Please enter your comment!
Please enter your name here