Sekretáriu Estadu Arte no Kultura, Teófilo Caldas. Imajen Tatoli/Egas Cristovão

DILI, 09 agostu 2020 (TATOLI)-Kada tinan Sekretaria Estadu Arte no Kultura (SEAK) sempre selebra loron nasionál kulturál iha 14 outubru, hanesan loron moris saudozu Borja da Costa.

Ba asuntu ne’e, Sekretáriu Estadu Arte no Kultura, Teófilo Caldas, hateten selebrasaun tinan ne’e Governu mantein selebra iha Munisípiu Lospalos no daudaun ne’e iha faze preparasaun.

“Loron nasionál kulturál ita foti loron moris saudozu Francisco Borja da Costa iha 14 outubru, tanba nia maka hakerek poezia ida kona-ba kultura no agora ita selebra loron ne’e iha Lospalos, ami konsistente la muda tenke selebra iha ne’ebá,” tenik Sekretáriu Estadu Teófilo ba Agência Tatoli, foin lalais ne’e, iha edifísiu Ministériu Finansa, Aitarak-Laran.

Notísia Relevante: SEAK Planeia Sei Realiza Festivál Nasionál Kulturál Iha Lospalos

Iha dezembru 2019, ekipa SEAK kompostu husi Sekretáriu Estadu, Diretór Jerál ho ekipa tékniku sira halo ona reuniaun ida iha Lospalos, hamutuk ho Administradór Munisípiu ho Administradór Postu Administrativu inklui responsável kultura iha Munisípiu Lautém no artista sira atu planea selebra loron nasionál kulturál.

Nune’e mós, governante ne’e informa, foin lalais ne’e komisaun organizadora halo ona enkontru preparasaun.

 “Loron 03 agostu sira halo enkontru tanba loron 30 agostu sei halo abertura ba kompetisaun,” nia akresenta.

Nia dehan, festivál ne’e sei partisipa hosi kada postu administrativu kompostu hosi grupu rua no sira mai hosi nível munisípiu.

Sei halo selesaun to’o iha nível nasionál no finalidade hosi prosesu selesaun festivál ne’e sei anúnsia iha 28 novembru no sei atribui prémiu ba manan-nain sira.

“Kada postu iha grupu rua, entaun postu administrativu 65 iha grupu 100 resin maka partisipa no iha eventu ne’e iha aprezentasaun múzika rezisténsia no seluk tán,” nia esplika.

Festivál kulturál ne’e rasik inisiativa hosi Prezidente Repúblika no husu Governu atu promove kultura Timor-Leste liuhosi eventu kulturál.

“Prezidente Repúblika husu ita promove atividade kulturál no valoriza ita-nia kultura tanba kultura sai hanesan identidade nasionál,” katak Teófilo.

Intensaun eventu kulturál atu promove kultura no halo ema hotu sente nain ba kultura.

“Ita harakarak realiza tinan ida iha munisípiu ida atu ema hotu sente sai nain ba kultura ne’e. Tanba kultura metin nasaun forti, entaun ita hakarak ema hotu sai nain ba kultura,” nia subliña.

Entretantu, eventu kulturál ne’e sei realiza atividade oioin, idéntiku ho sósiu-kulturál Munisípiu Lautém nian no sei asiste no partisipa husi entidade oioin, nune’mós bele fó rendimentu ba komunidade lokál sira no seluk tan.

Antes ne’e, Diretór Jerál Arte no Kultura, Manuel Ximenes Smith, informa tuir kalkulasaun orsamentu ba eventu ne’e hamutuk $50.000 to’o $60.000 tanba envolve munisípiu hotu no sei partisipa hosi entidade oioin, maibé bainhira uza rekursu iha Lospalos laran, tuir kalkulasaun hamutuk $35.000 to’o $40.000.

Nia mós dehan, objetivu realiza eventu ne’e iha munisipiu Lautém tanba atu hatudu ba joven sira hodi koñese, halo deskobrimentu foun no fahe informasaun turístiku ka kultura ne’ebé iha parke nasionál iha Com, Tutuala, Jaco, nune’e mós ba fatin turizmu seluk tan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here