Diretór Jerál Arte no Kultura, Manuel Ximenes Smith. Imajen: Nelia Fernandes

DILI, 03 fevereiru 2020 (TATOLI)-Diretór Jerál Arte no Kultura, Manuel Ximenes Smith informa, Sekretáriu Estadu Arte no Kultura planeia sei selebra Loron Festival Nasionál Kulturál iha Munisípiu Lautem.

“Tinan-tinan Sekretáriu Estadu Arte no Kultura sempre selebra loron nasionál kultura iha dia 14 de outubru, loron ida ne’e loron espesiál ba loron moris ita-nia saudozu Borja da Costa,” Diretór Jerál SEAK, Manuel Ximenes Smith informa ba Agência TATOLI, iha nia kna’ar fatin Avenida de Portugal, ohin.

Entaun, tuir ezekutivu ne’e, iha fulan klaran dezembru nian iha 2019, ekipa SEAK kompostu husi Sekretáriu Estadu, Diretór Jerál ho ekipa ba halo reuniaun ida iha Lospalos, ho administradór Munisípiu ho Administradór Postu Administrativu no mós responsavel kultura iha Munisípiu Lautem, inkluindu artista sira no planea atu selebra loron festivál NasionálKultura ne’e.

Nia esplika,  objetivu hala’o festivál iha munisipiu Lautem ne’e, primeiru atu halo, oinsá joventude sira liuhusi estudante atu bele koñese no mós atu bele halo deskobrimentu foun no mós ba informasaun turístiku ka kultura ne’ebé iha parke nasionál hahú husi Com, ba Tutuala, ba Jaco.

“Husi Tutuala ba Jaco no mós husi Lorehe ba Jaco, ida ne’e ita atu kolabora serbisu ho universitáriu sira no mós kompostu ho lider komunitáriu, lia na’in sira atu la’o ho ita-nia estudante sira, para halo interpretasaun ba ita-nia fatin istóriku”.

Nune’e, nia dehan, ita hatene katak husi Lorehe mai fatin istóriku barak iha ne’ebá, husi Com no Tutuala tun ba iha ita-nia Jaco Walu mós iha informasaun turístiku barak iha ne’ebá.

“Ida ne’e primeiru ita, oinsá atu sensibiliza liuhusi sira-nia Long March, depois sira foti informasaun no sira mós ba halo intrepretasaun no aprezentasaun iha Sentru Kulturál Lospalos ba iha dia nasionál do kultura ne’e rasik,” nia subliña.

Nia akresenta, hakarak konvida estudante sira oinsá sira-nia envolvimentu hodi fó importánsia ba ita-nia kultura rasik liuhusi atividade oioin. “Ita la halo ho dansa ho kanta de’it, maibé ita atu haburas siénsia koñesimentu juventude sira, ida ne’e mós hanesan meius ida para oinsá atu haree atrasaun estudante ba iha área kultura ne’e rasik”.

“Halo serbisu ne’e sei halo reuniaun hamutuk ho liña ministeriál, neste momento ko’alia informalmente ho ona liña ministériu balun no sira mós konkorda. Ita hein de’it oinsá atu implementa”.

Iha biban hanesan, Diretór Jerál Arte no Kultura, Manuel Ximenes Smith informa tan katak ekipa SEAK sei aranka fila fali ba iha Munisípiu Lautem iha abril, hanesan primeiru reuiaun ne’ebé ekipa SEAK reuniaun ho komunidade lokál alias ho Prezidente Autoridade, Administradór Postu, lia na’in sira, artista sira iha Lospalos, para haree kona-ba formulasaun ka kompozisaun estrutura ne’ebé atu serbisu ba iha festival nasionál arte kultura ida ne’e.

Tanba ne’e, tuir ezekutivu ne’e katak SEAK prepara hotu termu referénsia kona-ba eventu kulturál ne’e, depois formula tiha ekipa ida, ekipa ne’e harii tiha ona sei formula tan informasaun balun ne’ebé presiza priense iha termu referénsia ne’e no halo didi’ak atu ba reuniaun ho administradór  sira paraharee kona-ba sira-nia área responsabilidade no fó kompeténsia tomak ba iha autoridade lokál sira para sira mak jere no ekipa husi nasionál ba hanesan akompaña de’it ba halo monitorizasaun de’it, halo superviziona de’it kona-ba lala’ok husi festivál ne’e rasik.

Festivál ne’e SEAK sei uza rekuursu ne’ebé mak iha Lospalos rasik. “Purezemplu iha hanoin balun katak kuandu depois simu vizita sira husi Dili ba, Membru Governu no mós Korpu Diplomátiku sira sei utiliza kuda hanesan moru Lores  tradisionál ita-nia kuda sira, husi tama iha fatin festivál no mós depois ema hothotu koloka nia iha otel, karreta ou transporte ne’ebé uza husi Dili ba to’o iha ne’ebá ne’e sei la funsiona, ita halo hamate hotu. Ita sei uza transporte lokál husi komunidade sira atu nune’e komunidade sira bele benefisia husi atividade ne’e rasik. Ida ne’e hanoin hela atu implementa no ami ko’alia ona ho Ministériu balun katak sira prontu atu koopera liliu ba kulinaria tradisionál”.

Entretantu, eventu kulturál ne’e sei realiza atividade oioin, ne’ebé idéntiku ho sosiu-kulturál Munisípiu Lautem nian no sei asiste no partisipa husi entidade oioin, nune’e “ekonomikamente” mós bele fó rendimentu ba komunidade lokál sira no seluk tan.

Notísia relevante:SEAK Halo Abertura Espozisaun Pintura “Ha’u-Nia Kriasaun” Iha Timor Plaza

Jornalista: Nelia Fernandes

Editór     : Rafy Belo

HAKEREK NO HATÁN

Please enter your comment!
Please enter your name here