Guarda Prijaun Becora tulun dadur sira sa'e karreta hodi transfere ba Prijaun Suai. Imajen/dok. Tatoli

DILI, 08 agostu 2020 (TATOLI)-Ministériu Justisa (MJ) liuhosi Diresaun Nasionál Prizaun hamutuk ho Diresaun Prizaun Becora, iha sábadu ne’e halo ona tranferénsia dadur hamutuk ema na’in-21 hosi Prizaun Becora bá Prizaun Suai tanba daudaun ne’e dadur sira liu ona kapasidade.

Diretór Estabelesimentu Prizaun Becora, João Domingos, hateten prosesu tranferénsia ne’e akontese bazeia ba rezultadu observasaun hosi Vise-Ministru Justisa, José Edmundo Caetano, iha loron 06 no 07 agostu, tanba rejistu Prizaun Becora akumula dadur liu ona kapasidade.

Tuir loloos, Prizaun Becora akumula de’it dadur hamutuk ema na’in-200 maibé to’o sabádu (08/08) akumula ema hamutuk 590.

Notísia Relevante: Dadur 45 iha Becora Transfere ba Prizaun Suai

Tanba ne’e, hosi ema na’in-590 ne’e, ohin transfere ona dadur na’in-21, kompostu husi kondenadu 20 no preventiva na’in-ida no sira maihosi área jurizdisaun Tribunál Suai ne’ebé kobre Munisípiu Covalima, Ainaro, Bobonaro no Manufahi.

Dadur ne’ebé maka sei hela iha prizaun Becora hamutuk 569, kompostu hosi kondenadu na’in-444 no preventiva na’in-125.

Ho transferénsia dadur hosi Prizaun Becora bá Prizaun Suai ne’e maka kompleta ona dadur hamutuk ema na’in-100.

“Kapasidade iha prijaun Suai bele akumula ema to’o de’it 120, tanba ne’e sei falta tan ema na’in-20,” dehan Diretór João Domingos, iha Prizaun Becora, Dili, sábadu ne’e.

Tuir planu hosi Ministériu Justisa no Prizaun Becora nian, iha semana oin sei halo tan transferénsia dadur balun hosi Becora bá Gleno, Munisípiu Ermera.

Dadur iha Prizaun Gleno, daudaun ne’e bele akumula ema 104, tanba ne’e sei iha espasu mamuk atu kompleta to’o ema na’in-120.

“Ami sei halo selesaun ba dadur sira atu halo transferénsia ba Prizaun Gleno tanba ami iha ona konkordánsia ho Diretór Prizaun Gleno,” nia subliña.

Nia informa, dadur ne’ebé sei transfere ba Prizaun Gleno maihosi área jurizdisaun Dili, Liquiçá, Ermera no Aileu.

Antes ne’e, iha loron 02 setembru 2019, Prizaun Becora halo ona transferénsia dadur hamutuk ema na’in-45 ba Prizaun Suai ho razaun atu hamenus kondisaun naresin ona.

Jornalista: Agapito dos Santos

Editora: Julia Chatarina 

HAKEREK NO HATÁN

Please enter your comment!
Please enter your name here