DILI, 2 setembru 2019 (TATOLI)-Dadur na’in 45 ne’ebé durante ne’e kumpre sira nia sentensa iha Prizaun Becora, ohin, transfere fali ba prizaun Suai tanba kondisaun Prizaun Becora naresin ona (over capacity).
Notísia Relevante : Prezu 656 Halo Prizaun Becora “Over Capacity”
Diretór Estabelesimentu Becora, João Domingos informa, dadur sira balun husi Prizaun Becora muda ba Suai tanba Prizaun Becora nakonu liu tiha ona no tuir área jurisdisaun hanesan Munisípiu Bobonaro, Covalina, Manufahi no Suai bele besik família sira para fasil vizita sira nia maun-alin ka oan sira iha prizaun laran.
Nia hatutan, iha prizioneiru na’in haat konsidera nu’udar pre-juveníl husi área jurisdisaun Same nian mak labele transfere tanba atu fasilita formasaun oi-oin husi NGO sira.
Kona ba asegura seguransa dadur sira husi Dili ba iha Suai laiha problema, ho razaun katak sira hot-hotu iha komportamentu di’ak tebes durante iha prizaun laran.
Oras nee daudaun dadur sira iha Prizaun Becora hamutuk ema 602.
Jornalista : Domingos Piedade Freitas
Editór : Francisco Simões
