Diretór Nasionál ba Protesaun Direitu ba Ema ho Defesiénsia (DNPDPD, sigla portugés), Matias da Silva. Imajen/Osória Marques.

DILI, 05 agostu 2020 (TATOLI)–Diretór Nasionál ba Protesaun Direitu ba Ema ho Defesiénsia (DNPDPD, sigla portugés), Matias da Silva, hateten iha tinan 2019 Governu liuhosi Ministériu Solidaridade Sosiál no Inkluzaun (MSSI) liuliu DNPDPD fó apoiu orsamentu $372,131,13 ba ogranizasaun defisiente 10 iha Timor-Leste.

Matias hatutan, organizasaun hirak ne’e tinan-tinan Governu aloka osan ba sira hodi apoiu ba sira-nia atividade defisiente nian hanesan formasaun uza ai-tonka, lian jestuál sira no depende ba kada organizasaun defisiente ne’e, tanba iha Timor-Leste iha defisiente matan, tilun, ain-liman, defisiente mental no seluk tan.

Organizasaun defisiente 10 mak hanesan organizasaun AGAPE, AHISAUN, ETBU, KLIBUR DOMIN, PRADET, SÃO JOÃO Manatuto, SOLT, St, HDMTL, Sentru Dena Upakara PMY.

“Hosi organizasuan 10 ne’e, Governu aloka osan $372,131,13 ba sira hodi hala’o sira-nia atividade defisiente nian,” Diretór Nasionál ba Protesaun Direitu ba Ema ho Defesiénsia (DNPDPD, sigla portugés), Matias da Silva, ba Agência TATOLI iha nia knaar fatin MSSI, Caicoli, Dili, kuarta ne’e. 

hosi montante orsamentu refere, nia informa, organizasaun AGAPE simu osan $32,080,75, AHISAUN $26,324,90, ALMA SISTER $42,291,24, ETBU $24,066,14, KLIBUR DOMIN $65,495,43, PRADET $30,339,62, SÃO JOÃO Manatuto $60,449,51, SOLT $33,438,74, HDMTL $45,815,06, no Sentru Dena Upakara PMY $11,829,74.

Organizasaun defisiente ne’ebé mak Governu durante apoiu, Diretór ne’e hatutan, organizasaun sira-ne’e rejistu ona iha Ministériu Justisa no iha ona dalan legál ba sira hodi bele hetan tulun hosi Governu.

Aleinde ida ne’e, Diretór DNPDPD hateten, ema ho defisiénsia ka invalidéz hamutuk 7000-resin mak Governu fó ona subsídiu.

“Ami mós iha ona dadus kona-ba labarik estudante sira hamutuk 200-resin ne’ebé mak fó subsídiu bolsa da mãe hosi asesu ba eskola sira iha Timor-Leste. Asisténsia seluk ne’ebé mak iha mak Governu prepara aihan. Tanba Governu iha Sentru Nasionál Rehabilitasaun (CNR) ne’ebé fó ajuda kadeira-roda inklui ho ain-falsu liman-falsu no ai-tonka ba ema ho defisiénsia sira. No, iha terapi ba ema ne’ebé mak hetan moras stroke,” Matias da Silva hateten.

Nia infroma, organizasaun defisiente ne’ebe mak eziste iha Timor Leste hamutuk 24 hanesan AGAPE, AHISAUN, ALMA SISTER, ASSERT, DPO, ETBU, ESPERANSA, KLIBUR DOMIN, KATILOSA, PRADET, SÃO JOÃO Manatuto, SOLT, St. FRANCISCO, HDMTL, TIMOR AID, CARITAS DILI, FUAN NABILAN, FORUN TAU, Instituisaun HIV, BELUN, Sentru de Dia, Sentru Dena Upakara PMY, Kongresaun Irman Carmelita da Virjen Maria no Fundasaun Enklave Hadomi Defesiente.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here