Osan Dolar Amerikanu. Imajen/Google

Notísia ne’e retifika publikasaun iha http://www.tatoli.tl/2020/08/05/tl-impresta-osan-millaun-15-husi-banku-mundial/

Ba atensaun tomak, obrigadu.

Redasaun.

DILI, 07 agostu 2020 (TATOLI) – Governu liuhosi Ministru Finansa, Fernando Hanjam, kuarta, (5/8/2020) iha Ministériu Finansa (MF) asina akordu ho Banku Mundiál sobre projetu fortalesimentu no transformasaun ba edukasaun bázika (BEST, sigla inglés) ho valór milaun $8.55 husi apoiu esternu.

Projetu BEST ne’e sei implementa durante tinan lima nian laran (2020 to’o 2025), ho objetivu hasa’e profesór sira nia efetividade, materiál aprendizajen no avaliasaun, nomós utiliza prosesu planeamentu no implementasaun bazeia ba dadus (data driven).

Banku Mundiál mobiliza ona fundu adisionál husi modalidade emprestimu nian ho montante milaun $15 ne’ebé atu foku liu ba konstrusaun no re-abilitasaun aula ou sala eskola. Embora aprovasaun ba fundu empréstimu nian ne’e sei suspende hela, maibé fundu ne’e hola parte iha komponente husi dezeñu projetu ne’e rasik, aumenta husi fundu empréstimu ne’e mak totál investimentu ba projetu BEST ne’e rasik ho valór milaun $23.5.

“Intensaun loloos husi projetu BEST ne’e rasik mak atu foku liubá konstrusaun no re-abilitasaun aula ka sala eskola”, tenik Governante ne’e ba jornalista sira.

Fernando Hanjam hateten investimentu ba setór edukasaun importante, tanba nasaun investe ninia ema atu suporta prosesu dezenvolvimentu.

“Ha’u espera ita sei servisu hamutuk hodi atinje ita hotu nia objetivu hodi bele hetan rejultadu ne’ebé atu haforsa edukasaun ba labarik sira iha ita-nia nasaun no mos potensialmente transformativa husi inisiativa ne’e”, dehan Hanjam.

Ministru Armindo Maia konfesa akordu ne’e importante tebes. Maibé, selebrasaun ba imprestimu konsesionáriu seidauk bele asina tanba sei hein deliberasaun ikus iha Konsellu Ministru no aprovasaun orsamentu jerál Estadu 2020 nian.

Projetu BEST sei implementa ho totál orsamentu milaun $23.55 durante tinan lima. Husi totál orsamentu ne’e, milaun $15 husi Imprestimu Konsesionáriu (IDA loan ka SOFT LOAN) husi Banku Mundiál. Restu millaun $8.55 husi GRANT ka DOASAUN (la’os Imprestimu ka kreditu) husi GPE – Global Partnership for Education ka Parseria Globál ba Edukasaun.

“Konsesionáriu diferente ho imprestimu komersiál tanba para-alen-de nia funan ki’ik, nia perídou de grasa (Grace period) ho tempu naruk (tinan 10), ninia repayment period mós ho tempu ne’ebé naruk (tinan 30) totál tinan 40”, esplika ministru Maia.

Ne’eduni MF mak iha kompeténsia atu halo negosiasaun kona-ba imprestimu ida ne’e ho BM. Importante tebes atu públiku hatene katak desizaun atu foti imprestimu konsesináriu husi BM la’os desizaun MEJD nian , tanba la iha kompeténsia atu desidi foti imprestimu husi BM. Desizaun ida ne’e kabe ba kompeténsia Konsellu Ministru, afirma.

MEJD nia knaar mak atu dezeña programa hodi responde ba problema ne’ebé eskola no profesór sira hasoru. Programa ida mak BEST ne’e.  Osan hodi finansia programa sira ne’e mai husi desizaun MF no aprovasaun husi Konsellu Ministru.

Serimónia asina akordu ne’e hetan partisipasaun husi Ministru Edukasaun, Juventude no Desportu (MEJD), Armindo Maia, Country Representative Banku Mundiál iha Timor-Leste, Macmillan Anyanwu, diretór jerál no nasionál sira hosi MF no MEJD.

Jornalista: Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here