Prezidente Repúblika, Francisco Guterres ‘Lú Olo’, prezide reuniaun KSDS, iha Palásiu Prezidensiál, Bairro Pité, Dili, kuarta (08/05). Imajen Tatoli/Egas Cristovão

DILI, 05 agostu 2020 (TATOLI)-Prezidente Repúblika (PR), Francisco Guterres ‘Lú Olo’, prezide reuniaun Konsellu Superiór Defeza no Seguransa (KSDS) no Konsellu Estadu hodi rona membru sira-nia hanoin kona-ba pedidu Governu atu deklara Estadu Emerjénsia (EE) ba dahaat.

Tuir ajenda ne’ebé iha, reuniaun KSDS nian hahú tuku 9.30 dadeer no Konsellu Estadu hahú tuku 11.00. 

Reuniaun ne’e atu diskute deklarasaun EE, ne’ebé atu konsentra de’it ba fronteira terrestre tanba haree ba propagasaun surtu COVID-19 sei kontinua eziste iha nasaun barak no durante fulan-tolu nia-laran Timor-Leste livre husi pandemia globál ne’e, maibé horisehik rejista tan kazu positivu covid-19 ida.

Notísia Relevante: Governu solisita PR dekreta tan EE ba loron-30

Hafoin rona opiniaun hosi membru KSDS no Konsellu Estadu, Xefe Estadu sei haree katak presiza ka lae halo deklarasaun EE, hafoin sei husu autorizasaun hosi Parlamentu Nasionál (PN), karik PN aprova maka PR sei deklara EE. 

Membru  sira ne’ebé maka hola parte iha KSDS maka Prezidente Repúblika, Francisco Guterres ‘Lú Olo’, Primeiru-Ministru, Taur Matan Ruak, Ministra Negósiu Estranjeiru no Kooperasaun, Maria Adalzija Magno, Ministru Defeza no Seguransa, Filomeno Paixão,  Ministru Justisa, Manuel Cárceres, Xefe Estadu Maiór Jenerál FALINTIL-Forsa Defeza Timor-Leste (F-FDTL), Lere Anan Timur, Komisáriu Polísia Nasionál Timor-Leste (PNTL), Faustino da Costa no Diretór Jerál Servisu Nasionál Intelijénsia, Manuel Serrano. 

Hola parte mós iha konsellu ne’e,  membru nomeadu  sira hosi PN, Adérito Hugo da Costa, David Dias Ximenes, Abel Pires da Silva no membru nomeadu sira hosi Prezidente Repúblika maka José Manuel Fernandes ‘Nakfilak’.

Membru  sira ne’ebé halo parte Konsellu Estadu mak Prezidente Repúblika, eis Prezidente Repúblika no atuál Primeiru-Ministru, Taur Matan Ruak,  eis Prezidente Repúblika, Kay Rala Xanana Gusmão, eis Prezidente Ramos Horta, Prezidente Parlamentu Nasionál, Aniceto Longuinhos Guterres Lopes.  

Hola parte mós iha konsellu ne’e, membru sira nomeadu husi Prezidente Repúblika maka hanesan Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa no membru noameadu hosi PN maka hanesan Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite no  José dos Santos ‘Naimori Bucar’.

Entretantu, reuniaun konsellu rua ne’e, iha ámbitu pedidu deklarasaun EE ne’ebé liu ona, maibé Prezidente Repúblika sei konvida mós ba reuniaun aban nian, Rui Araújo, Danina Coelho, nu’udar médiku no mós Diretór Ezekutivu, Fórum Organizasaun Naun Govermentál ( FONGTIL), Daniel dos Santos Carmo.

Governu liuhosi reuniaun Konsellu Ministru estraórdinaria iha tersa ne’e, halo deliberasaun atu solisita ba Prezidente Repúblika (PR), Francisco Guterres ‘Lú Olo’, hodi deklara Estadu Emejénsia (EE) dala-ida tán ba loron- 30, ligadu ho surtu COVID-19. 

Deklarasaun EE ba faze dahaat ne’e ho objetivu atu proteje saúde públika no asegura sistema saúde bainhira mosu surtu ruma. 

Iha períodu EE ne’e sei la implika ba atividade sira ne’ebé maka la’o iha territóriu nasionál, maibé haree liubá iha restrisaun direitu ba sirkulasaun internasionál, fiksasaun rezidénsia no direitu ba rezisténsia. 

Antes ne’e, EE ba períodu datoluk implementa iha oras 00:00 loron 28 maiu no ramata iha oras 23:59 loron 26 juñu 2020. 

Tribunál Rekursu deklara katak pedidu Dekretu-Lei Vijilánsia Epidemiolójika no Sanitária ne’ebé Governu hato’o ne’e inkonstutusionál, entaun dalan ida ne’ebé mak di’ak liu atubele fasilita no garante ezekutivu iha podér atubele halo atuasaun sira, hanesan bele restrizi direitu sidadaun nian maka Governu presiza dala-ida tán Prezidente Repúblika dekreta EE.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here