Primeiru-Ministru, Taur Matan Ruak prezide reuniaun Konsellu Ministru estraordinária, iha Palásiu Governu, segunda (03/08), Imajen Tatoli/Egas Cristovão

DILI, 03 agostu 2020 (TATOLI)-Governu liuhosi reuniaun Konsellu Ministru estraórdinaria iha tersa ne’e, halo deliberasaun atu solisita ba Prezidente Repúblika (PR), Francisco Guterres ‘Lú Olo’, hodi deklara Estadu Emejénsia (EE) dala-ida tán ba loron-30, ligadu ho surtu COVID-19.

Deklarasaun EE ba faze dahaat ne’e ho objetivu atu proteje saúde públika no asegura sistema saúde bainhira mosu surtu ruma.

Ministru Prezidénsia Konsellu Ministru, Fidelis Manuel Leite Magalhães, hateten iha períodu EE ne’e sei la implika ba atividade sira ne’ebé maka la’o iha territóriu nasionál, maibé haree liubá iha restrisaun direitu ba sirkulasaun internasionál, fiksasaun rezidénsia no direitu ba rezisténsia.

“Direitu tolu ne’e maka sei hetan restrisaun ho implementasaun Estadu Emerjénsia, ne’ebé maka Primeiru-Ministru sei hakerek karta husu ba Prezidente Repúblika deklara Estadu Emerjénsia. Foku ba iha restrisaun ba direitu ne’e no populasaun sira lalika preokupa tanba atividade sira ne’ebé mak loron-loron la’o hela kontinua nafatin hanesan bain-bain,” dehan Ministru Fidelis hafoin reuniaun ezekutivu iha Palásiu Governu, segunda ne’e.

Notísia Relevante: Aban, Governu halo deliberasaun proposta ba pedidu deklarasaun EE

Antes ne’e EE ba períodu datoluk implementa iha oras 00:00 loron 28 maiu no ramata iha oras 23:59 loron 26 juñu 2020.

Governante ne’e hatutan, buat hotu ne’ebé maka iha rai-laran sei relaxa hanesan EE sira antes ne’e kontinua nafatin, maibé preokupasaun boot liu maka ba sirkulasaun internasionál, esesaun rezidénsia no direitu ba rezisténsia.

“Tuir Governu nia hanoin, foin lalais ne’e Tribunál Rekursu deklara katak pedidu Dekretu-Lei Vijilánsia Epidemiolójika no Sanitária ne’ebé Governu hato’o ne’e inkonstutusionál, entaun dalan ida ne’ebé mak di’ak liu atubele fasilita no garante ezekutivu iha podér atubele halo atuasaun sira, hanesan bele restrizi direitu sidadaun nian maka Governu presiza dala-ida tán Prezidente Repúblika dekreta Estadu Emerjénsia,” subliña Ministru.

Portavóz Governu ne’e realsa, atu limita ema-nia direitu hodi tau sidadaun sira iha izolamentu, kuarentene, taka zona espesífiku sira, presiza iha deklarasaun EE, sein ida-ne’e Governu labele hatuur regra.

Tanba ne’e, liuhosi deklarasaun EE ba faze ne’e maka ezekutivu sira bele hola medida hirak ne’ebé maka iha ninia implementasaun dala-ruma sei reztrinje direitu balun hosi sidadaun sira.

Deliberasaun ne’e Governu propoin ba Xefe Estadu no sei haruka ba Parlamentu Nasionál, hafoin haruka hikas ba PR atu dekreta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here