Plenária Parlamentu Nasionál. Imajen Tatoli/António Gonçalves

DILI, 05 agostu 2020 (TATOLI)—Parlamentu Nasionál autoriza ona Prezidente Repúblika (PR), Francisco Guterres “Lú Olo” dekreta Estadu Emerjénsia (EE) maibé votu konfirmasaun sei hala’o iha loron 11 agostu 2020.

Notísia Relevante: Posibilidade, Ohin PR Haruka Proposta Estensaun Estadu Emerjénsia ba PN

Ohin, Komisaun Permanente Parlamentu Nasionál foti desizaun dahuluk kona-ba mensajen hosi Prezidente Repúblika husu parlamentu autoriza deklarasaun Estadu Emerjénsia hahú hosi 00.00 oras iha loron 06 agostu 2020 (kinta-feira) to’o oras 23.59 iha loron 4 setembru 2020 durante loron 30 (30 dias) ba zona sira iha fronteira, aeroportu no portu.

Autorizasaun ne’e aprova liuhosi projetu deliberasaun númeru 5/V/2 kona-ba konvokasaun Parlamentu Nasionál nian. Projetu deliberasaun ne’e aprovadu ho rezultadu votasaun a-favór 20, kontra 0 no abstensaun 0.

Nune’e mós projetu rezolusaun númeru 58/20 kona-ba autorizasaun deklarasaun Estadu Emerjénsia ho rezultadu votasaun a-favór 20 kontra 0 no abstensaun 0.

“Rezolusaun númeru 58/20 pasa nune’e autorizasaun estadu emerjénsia pasa ho rezerva plenária estraordinária ba konfirmasaun ba autorizasaun ida-ne’e hosi Parlamentu Nasionál sei halo iha loron tersa, 11 agostu 2020,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, kuarta ne’e.

Prezidente Repúblika solisita ba Parlamentu Nasionál hodi deklara Estadu Emerjénsia iha territóriu nasionál tomak, bazeia ba Lei nú 3/2008, 22 fevereiru, ne’ebé aprova rejime estadu de sítiu no estadu emerjénsia. PR husu Parlamentu Nasionál tenke reuni ho lalais halo apresiasaun ba pedidu autorizasaun ne’e.

Komisaun Permanente Parlamentu Nasionál, hala’o reuniaun iha loron 05 agostu  2020 delibera bazeia ba alínea c númeru 3 artigu 102 hosi Konstituisaun RDTL no aplikasaun konjuga ho alínea c artigu 40 no artigu 48 Rejimentu Parlamentu Nasionál nian, hodi halo realizasaun reuniaun plenária extraordinária ba efeitu apresiasaun prdidu autorizasaun hosi Prezidente Repúblika hodi deklara estadu emerjénsia. Votu konfirmasaun sei hala’o iha loron 11 agostu 2020.

“Komisaun Permanente iha Parlamentu Nasionál autoriza katak Prezidente Repúblika bele dekreta Estadu Emerjénsia tanba ita iha ona situasaun alerta kalamidade públika iha parte fronteira, tanba ne’e mak urjente parlamentu fó autorizasaun ba prezidente hodi bele Governu hala’o nia knaar,” dehan Deputadu Bankada FRETILIN, Joaquim dos Santos.

Entretantu, Vise-Xefe Bankada CNRT, Deputadu Patrocínio dos Reis hateten, Governu presiza justifika molok autoriza Prezidente Repúblika dekreta Estadu Emerjénsia.

“Ba ha’u haree katak situasaun iha terrenu ne’e la fó razaun ida katak ita iha ona estadu serku ka estadu emerjénsia,” nia dehan. 

Iha biban hanesan, Deputadu Bankada FRETILIN, David Dias Ximenes “Mandati”, la konkorda ho deklarasaun ne’e tanba Lei Protesaun Sivíl hanesan alerta ka alarma de’it.

“Ita labele hanoin dehan Coronavirus (COVID-19) tama tiha mai mak ita book-aan, ne’e labele. Tanba ne’e, ita tenke prepara-aan antes,” Deputadu Mandati hateten.

Membru Bankada CNRT, Deputada Carmelita Caetano Moniz, hateten Timor-Leste seidauk tama iha situasaun emerjénsia.

“Se Prezidente-Repúblika preokupa ho situasaun ne’e di’ak liu promulga mak Lei Protesaun Sivíl ne’e, lalika to’o Estadu Emerjénsia.  Ha’u hanoin loron ida Governu lori Lei Protesaun Sivíl mai parlamentu ho karáter urjénsia. Ha’u-nia hanoin lei ne’e serve atu rezolve situasaun sira-ne’e tanba iha lei ne’e iha etapa tolu (3), alerta, kontijénsia no kalamidade,” Deputada Carmelita Caetano Moniz, fó hanoin ne’e bainhira debate konvokasaun Parlamentu Nasionál hodi halo apresiasaun ba pedidu autorizasaun hosi Prezidente Repúblika hodi deklara estadu emerjénsia, iha plenária, kuarta ne’e.

Pedidu Prezidente Repúblika, Francisco Guterres “Lú Olo”, ba Parlamentu Nasionál bazeia ba Konsituisaun RDTL artigu 85 alínea g hodi deklara Estadu Emerjénsia iha territóriu nasionál tomak, hahú hosi loron 06 agostu to’o 04 setembru 2020.

“Solisita autorizasaun ne’e hodi deklara Estadu Emerjénsia iha territóriu nasionál ba loron 30 (30 dias), hahú hosi oras 00.00 iha loron 6 agostu 2020 (kinta-feira) to’o oras 23.59 iha loron 4 setembru 2020 (sesta-feira),” haktuir pedidu hosi PR ba PN. 

Iha pedidu ne’e aplika estadu emerjénsia iha territóriu nasionál hahú hosi hosi 00.00 oras iha loron 6 agostu 2020 (kinta-feira) to’o oras 23.59 iha loron 4 setembru 2020 (sesta-feira) durante loron 30 (30 dias) sei suspende atividade ezersísiu sira hanesan:

  1. Sirkulasaun internasionál sira bele kontrola liuhosi portu, aeroportu, postu fronterira terrestre impede labele mai territóriu nasionál Timor-Leste nian nune’e evita propagasaun epidemia
  2. Liberdade sirkulasaun no fixasaun (fixação) iha rezidénsia kualkér pontu iha territóriu nasionál no kontrola hosi autoridade kompetente, halo restrisaun ba komunidade hodi redúz risku kontájiu.
  3. Direitu rezidénsia, ema hotu sei hela iha uma no kontrola hosi autoridade públika durante ezekusaun estadu emerjénsia.

Iha mensajen Prezidente Repúblika nian hateten pandemina COVID-19 iha ona provokasaun daruak iha ameasa mundu tanba ne’e Timor-Leste tenke prepara-aan.

Pedidu ne’e aprezenta ba Parlamentu Nasionál, ohin, hodi asegura HGovernu iha meiu legál nesesáriu hodi halo intervensaun rapidamente hasoru surtu COVID-19 iha Timor-Leste.

PR Lú Olo husu pedidu ne’e ba PN bazeia ba solisitasaun hosi Governu kona-ba aplikasaun Estadu Emerjénsia ne’e.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here