Komisáriu CAC, Sérgio Hornai. Imajen Tatoli/Cipriano Colo

DILI, 05 agostu 2020 (TATOLI) – Ekipa konjunta  kompostu husi  Komisaun Anti-Korrupsaun (CAC), Provedoria Direitu Umanu no Justisa (PDHJ), Inspesaun Jerál Estadu (IGE) no Komisaun Funsaun Públika (CFP) deteta mosu irregularidade ka indísiu favoritizmu iha alugér veíkulu (karreta privadu) hodi fasilita transporta ekipa pagamentu subsídiu monetáriu agregadu familiár ba territóriu nasionál ne’ebé hala’o husi Ministériu Solidariedade, Sosiál no Inkluzaun (MSSI).

Notísia Relevante : Benefisiáriu 148 tenke devolve subsídiu agregadu familiár

Komisáriu CAC, Sergio Hornai, liuhusi konferénsia imprensa, ohin, iha edifísiu CAC, Farol, Dili, informa tuir monitorizasaun sira-nia parte identifika iha indísiu katak veíkulu (privada) sira ne’ebé Governu kontrata husi empreza privada nia perfíl no lisensiamentu husi SERVE, IP, hatudu katak empreza ne’e la’ós atu fó-aluga veíkulu, maibé nia lisensa atu halo atividade ekonómiku hodi fa’an motosiklus, pesa no asesóriu, manutensaun no reparasaun ba motorizada.

“Ida-ne’e potensiálmente hatudu indísiu favoritizmu ka familiarizmu iha prosesu selesaun no desizaun,” afirma Komisáriu CAC, Sergio Hornai.

Antes ne’e Diretór  Aprovizionamentu MSSI, Danino da Cunha, informa, Governu aloka $279.720  hodi aluga  karreta hamutuk 148 ne’ebé mak fó apoiu ba karreta patrimóniu Estadu nian hamutuk 181 hodi fasilita ekipa pagamentu ba iha munisípiu 12.

Nia hatutan, karreta hirak ne’e, Governu  mak selu karreta 106 no parseiru Ajénsia Austrália  mak selu 42 ba loron 14 iha munisípiu sira.

“Ita aluga de’it   mak 106 ho montante orsamentu $200.340,00, ne’ebé  mak husi fundu COVID-19 nian no karreta 42 ita-nia parseiru Ajénsia Austrália mak suporta ho osan $79.380,” Danino da Cunha informa.

Agência Tatoli halo ona kontaktu ho Diretór  Aprovizionamentu MSSI, Danino da Cunha, maibé nia hatan, sei fó entrevista ba TATOLI iha loron aban, (6/8/2020).

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here