Membru PN husi Bankada FRETILIN no membru Komisaun B, David Dias Ximenes "Mandati". Imajen/ António Gonçalves

DILI, 04 agostu 2020 (TATOLI)—Membru Komisaun B (Negósiu Estranjeiru, Defeza no Seguransa), David Dias Ximenes “Mandati”, hateten iha Timor-Leste liuliu Komisaun B iha Parlamentu Nasionál atu urjentemente aplika vijilánsia populár iha área fronteira nune’e bele antesipa propagasaun surtu COVID-19.

Notísia Relevante: Timor-Leste rejista kazu foun ida ba COVID-19

David Dias Ximenes “Mandati”, oras ne’e hein hela Ministériu Saúde anunsia kona-ba ema ida ne’ebé pozitivu COVID-19 ne’e iha Timor-Leste, tanba nia espera katak Governu iha medida preventiva nesesáriu hodi atua situasaun ne’e (coronavirus)  iha área fronteira.

“Vijilánsia iha fronteira parese esforsu ne’e iha hela. Horisehik ami hetan informasaun katak Vise-Minitru Interiór ba to’o iha fronteira ne’ebá para aumenta postu polisiais hodi halo duni barreira ba ema sira-ne’ebé tama ilegál sira-ne’e. Loloos buat sira hanesan ne’e labele husik de’it ba seguransa ninian. Maibé seguransa ne’e tenke populár katak seguransa ne’e hotu-hotu envolve-aan, tanba karik COVID-19 ne’e tama sei la haree de’it ba seguransa. Tanba, buat ne’e tama kona ita hotu entaun ita hotu tenke halo vijilánsia para depois buat ne’e labele da’et ba ita,” dehan Membru Komisaun B, David Dias Ximenes “Mandati”, ba jornalista sira, iha Parlamentu Nasionál, tersa ne’e.

Eis Prezidente Komisaun B ne’e fó hanoin katak ema sé de’it mak moris iha Timor-Leste, atu sidadaun TL ka la’ós sidadaun TL nian tenke sente obrigasaun ida-ne’e para informa saida mak mosu ba Governu.

“Tanba abitualmente kuandu na’ok-teen ruma atu tama ita-nia rain entaun ita-nia alarmadu katak nia mak mai ona. Tanba, Coronavirus (COVID-1) ne’e mai karik la’ós ba ema ida de’it. Ne’ebé, labele iha fali ema ida ka ema rua de’it iha fronteira ne’ebá, ne’ebé atu fasilita de’it nia família mai hosi sorin depois estraga hotu ita-nia sosiedade iha Timor-Leste. Ida-ne’e mak obrigasaun tomak ita timoroan ninian,” nia dehan. 

Atu antesipa propagasaun surtu COVID-19 ne’e, nia hateten, labele tama Timor mak iha opiniaun rua, ida kontinua deklara estadu emerjénsia hodi halo estakamentu iha fronteira.

“Kuandu meiu legál ne’e iha depois ita-nia Governu halo estakamentu iha fronteira signifika ema ida labele kontra. Entaun, instituisaun koasaun sira bele obriga ona ema ba medida kuarentena obrigatória maibé bele mós Governu medida administrativa,” nia dehan.

Tanba, tuir nia, Governu iha legalidade tomak proteje ninia povu, atu forma estadu ne’e iha objetivu ne’e iha tolu, primeiru seguransa, segundu justisa no ikus liu mak moris di’ak.

Nia esplika, seguransa ne’e atu proteje ninia sosiedade, saida de’it tenke proteje maibé sé mak la obdese nia tenke toma responsabilidade.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here