Primeiru-Ministru, Taur Matan Ruak. Imajen Tatoli/Egas Cristovão

DILI, 04 agostu 2020 (TATOLI)-Hafoin Timor-Leste-Leste livre kazu COVID-19 durante fulan-tolu nia laran, daudaun ne’e rejista tan kazu ativu foun ida.

Primeiru-Ministru (PM), Taur Matan Ruak, informa hafoin Governu Timor-Leste husu atu Prezidente Repúblika atu dekreta Estadu Emerjénsia ba dahaat, ohin Timor-Leste rejista tan kazu foun pozitivu ba COVID-19.

“Horisehik, mak ami iha Konsellu Ministru deside halo proposta ba Prezidente Repúblika deklara Estadu Emerjénsia, ohin dader Ministra Saúde informa ba ha’u dehan ita iha kazu ida tanba ba COVID-19,” tenik PM Taur hafoin halo abertura ba jornada orsamentál 2021, iha Ministériu Finansa Aitarak-Laran, tersa ne’e.

Ho nune’e, Xefe Governu husu ba sidadaun sira atu kontinua kuidadu hodi tuir regra sanitáriu sira atubele kombate pandemia globál ne’e.

“Ita tenke prepara-an ba senáriu di’ak no mós prepara-an ba senáriu a’at, maibé importante liu tenke tuir regulamentu sanitáriu sira,” PM fó hanoin.

Ho kazu foun ne’e, Agência Tatoli tenta atu entrevista  Ministra Saúde no Diretór Jerál, maibé husu atu hein informasaun ofisiál hosi Ministériu Saúde iha tuku 3 lorokraik ne’e.

Kazu pozitivu COVID-19 ne’e afeta ba sidadaun estranjeiru ida hosi Indonézia.

Hafoin Timor-Leste rejista kazu pozitivu COVID-19 dahuluk iha 21 marsu 2020, kazu ikus liu rejista iha 24 abríl ho totál konfirmadu na’in-24 no provável na’in-haat.

Enkuantu, iha loron 15 maiu, liuhosi Sala Situasaun, Sentru Integradu Jestaun Krize (CIGC, sigla portugés) deklara pasiente konfirmadu no provável rekuperadu hotu ona.

Kazu konfirmadu ne’ebé rejistadu iha Timor-Leste hanesan kazu importadu husi sidadaun ne’ebé halo viajen husi nasaun afetadu COVID-19 no Tama mai Timor-Leste liuhosi dalan fronteira terrestre no aeroportu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here