Vitíma nu'udar Estudante Universidade da Paz (UNPAZ), Alfredo Miranda Alves, ne'ebé ema deskoñesidu sona, seugnda horseik. Imajen/Tome Amado.

DILI, 04 agostu 2020 (TATOLI)-Polísia Nasionál Timor-Leste (PNTL) liuhosi komandu Polísia Munisípiu Dili kontinua buka tuir   autór ka suspeitu ne’ebé sona kanek vítima Alfredo Miranda Alves iha aredór Universidade da Paz (UNPAZ), segunda horiseik.

Notísia Relevante : Ema deskoiñesidu sona estudante UNPAZ

Vítima Alfredo Miranda Alves ne’ebé hetan sona iha parte kabas liman-karuk nian ne’e nu’udar estudante UNPAZ husi Fakuldade  Saúde Públiku, turma B, semester IV.

Portavós PNTL, Superintendente Xefe Arnaldo de Araújo. Imajen/Eugénio Pereira

 “Ita hotu hatene akontese horiseik iha UNPAZ ne’ebé suspeitu sei deskoñesidu hela no agora daudaun polísia sei halo hela investigasaun. Ita hein katak iha tempu badak bele hatene nia rezultadu loloos atu ami bele kaptura” hateten portavós PNTL Superintendente Xefe Arnaldo de Araújo, ohin, liuhosi konferénsia imprensa iha Komandu PNTL, Caicoli, Dili.

Nia mós husu ba komunidade no estudante ne’ebé eskola hamutuk ho vítima karik hatene kona-ba suspeitu sira  bele informa direita ba polísia Munisípiu Dili.

“Tuir informasaun ne’ebé iha daudaun vítima iha ona uma hafoin akontesimentu, nune’e husu maluk sira ne’ebé hatene kona-ba suspeitu ne’ebé deskoñesidu bele fó hatene ba polísia hodi identifika hodi  halo prosesu,” nia hateten.

Hatán kona-ba mezmu daudaun  iha postu polísia ida monta iha area UNPAZ mas  tanbasá la fó seguransa di’ak to’o ema hakanek estudante, Superintendente Xefe Arnaldo de Araújo, lia tun dehan, la konsege identifika antes tanba mosu espontánea mezmu polísia mós fó seguransa maibé parte balun bele akontese.

Arnaldo de Araújo hateten, tanba ne’e ema hotu atu asegura nia-an no kolabora ho polísia kuandu iha buat ruma haree tenke informa lalais.

Polísia mós seidauk bele esplika kona-ba akontesimentu kazu sona estudante ne’e iha ligasaun ho kazu antes ne’e ne’ebé rezulta joven ida mate, tanba sei iha prosesu investigasaun.

Superintendente Xefe Arnaldo de Araújo mós informa katak, kona-ba kazu  dezentendimentu tuda malu no sona kanek estudante iha semana hirak liu ba ne’ebé akontese iha  area Universidade Dili (UNDIL) no DIT (Dili Institute of Technology)  daudaun ne’e iha prosesu investigasaun.

Kazu iha area UNDIL nian estudante ida hetan tuda kanek iha reen-toos no ulun  no  iha DIT ne’ebé rezulta estudante na’in-ida mós  hetan sona hosi ema deskoñesidu ne’ebé rezulta sona kanek hosi kotuk laran.

“PNTL Munisípiu Dili halo ona investigasaun nia andamentu prosesu la’o hela hein katak iha tempu badak bele lori ona ba Ministériu Públiku hodi submete ba Tribunál,” Superintendente Xefe Arnaldo de Araújo hateten.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here