COVID-19

DILI, 04 agostu 2020 (TATOLI)-Vise Koordenadór Jerál Komisaun Ezekutivu Saúde ba Surtu COVID-19, Narcísio Fernandes, hateten sidadaun Indonézia ida ne’ebé konfirmadu COVID-19 foun daudaun ne’e izola ona iha fatin izolamentu sentru saúde Vera-Cruz, Kaikoli.

Sidadaun mane ne’e maihusi Java Sentrál Indonézia  ho aviaun Citilink to’o iha Kupaun, Nusa Tenggara Timur (NTT) iha loron 21 fulan-jullu no iha loron 22 fulan hanesan tama iha territóriu Timor-Leste liuhosi fronteira terrestre Motain, Munisípiu Bobonaru.

Notísia Relevante :Timor-Leste rejista kazu foun ida ba COVID-19

Loron hanesan ekipa saúde lori kedas sidadaun ne’e hodi kumpre kuarentena obritatóriu iha Tasi-Tolu Dili.

“Ohin rezultadu sai pozitivu ekipa husi pilar neen transfere kedas pasiente pozitivu COVID-19 husi kuarentena Tasi-Tolu mai iha sala izolamentu Vera-Cruz”, dehan Narcisio Fernandes durante konferénsia imprensa iha salaun Ministériu Saúde, Kaikoli.

Tuir dadus; ema na’in 105 maka la’o hamutuk ho pasiente konfirmadu ho idade 46 ne’e bainhira tama mai territóriu TL iha fulan kotuk.

”Ema ne’ebé mak la’o hamutuk ho sidadun pozitivu COVID-19 hamutuk 105 tama legál no nain neen tama ilegál hamutuk 111 agora daudaun tama hotu kuarentena Tasi-Tolu ne’ebé mak Governu prepara”, tenik Vise Koordenadór Jerál Komisaun Ezekutivu Saúde ba surtu COVID-19.

Ho kazu foun ne’e, Ministériu Saúde apela ba komunidade atu mantein kalma no labele pániku maibé kontinua uza máskara, matein distansia sosiál no fiziku, fase liman beibeik ho sabaun, evita halibur malu iha grupu no seluk tan.

“Husu mós ba komunidade hamutuk ho autoridade lokál sira iha área fronteira nian atu kontrola komunidade sira ne’ebé mak tama ilegál no husi rai ketan mai iha territóriu Timor laran tomak”, dehan nia.

Alende ne’e, husu ba fasilidade públiku sira hanesan merkadu, igreja no fatin públiku seluk atu nafatin kumpre medida prevensaun COVID-19.

Entretantu, númeru komulativu kazu konfirmadu tuan no foun hamutuk 25, kazu konfirmadu foun nain ida, númeru komulativu teste 4.244, rezultadu negativu 4.186, hein rejultadu 33,númeru rekuoeradu ona (konfirmadu+provavel=24+4=28).

Jornalista : Felicidade Ximenes

Editór       : Agapito dos Santos

1 KOMENTÁRIU

  1. Heran etuan e duvidas mos. Se wainhra nia husi Indonesia, java sentral ntaun nia liu ona presesu naruk, hnsan iha “surat jalan” husi ospital indonesia ktk nia bebas covid. Tamba indonesia deit, iha era new normal sira iha rekezitu barak ba ema nb halo viagen ho aviaun. Pergntas: tamba sa part relevante la husu ninia surat saude knb bebas covid-19?

HAKEREK NO HATÁN

Please enter your comment!
Please enter your name here