Vise-Governadór BCTL, Venâncio Maria Alves. Imajen Tatoli/António Gonçalves

DILI, 04 agostu 2020 (TATOLI)-Maski Parlamentu Nasionál (PN) aprova ona proposta Lei númeru 17/V (2) kona-ba realizasaun ba transferénsia estraordinária fundu mina-rai daruak ho montante millaun $286,8 iha loron 23 juñu no hetan ona promulgasaun ona hosi Prezidente Repúblika, maibé to’o oras ne’e Banco Central Timor-Leste (BCTL) ne’ebé hanesan jestór ba fundu seidauk simu pedidu transferénsia fundu hosi Governu.

Vise-Governadór BCTL, Venâncio Alves Maria, konfirma Banku Sentrál seidauk simu instrusaun ruma hosi Governu hodi halo transferénsia fundu mina-rai daruak ne’ebé mak foin lalais PN autoriza ona levantamentu.

“Foin lalais aprova millaun $286,8 ne’e, BCTL seidauk simu instrusaun ruma hosi Governu hodi halo transferénsia,” hateten Vise-Governadór BCTL hafoin halo lansamentu ba relatóriu trimestrál daruak ba fundu mina-rai iha salaun enkontru BCTL, Akait, tersa ne’e.

Notísia Relevante: Governu Hato’o Pedidu Levantamentu Millaun $286,8 Atu Garante Funsionamentu Estadu

PN Autoriza Transferénsia Estraordinária Daruak Husi Fundu Petrolíferu Millaun $286,8

Tuir Venâncio Alves, Banku Sentrál halo transferénsia fundu mina-rai tuir pedidu Governu ikus liu maka ho montante millaun $250, ne’ebé hanesan pedidu levantamentu dahuluk iha tinan 2020.

“Ida-ida aprova uluk hodi rezolve situasaun COVID-19 no bele reforsa kofre Estadu, ne’ebé millaun $250 ne’e ami transfere hotu ona iha trimestre ida-ne’e nia-laran,” nia akresenta.

Iha loron 6 abríl PN autoriza ona tranferénsia fundu mina-rai dahuluk liuhosi lei númeru 2/2020 ho montante millaun $250.

Tanba Governu haree orsamentu la sufisiente to’o Orsamentu Jerál Estadu (OJE) 2020 tama ein-vigór, tanba ne’e ezekutivu sira husu PN hodi autoriza halo transferénsia ho montante millaun $286,8, ne’ebé totál orsamentu ne’e atu reforsa kofre Estadu finánsia servisu administrasaun públika ho montante millaun $168,8 no antesipa despeza hasoru COVID-19 inklui rekuperasaun atividade ekonómika ho alokasaun millaun $100 ba Fundu COVID-19 to’o OJE 2020 vigora.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here