Ambiente iha sala plenáriu Parlamentu Nasionál. Imajen Tatoli/Egas Cristovão

DILI, 23 abríl 2020 (TATOLI) – Parlamentu Nasionál (PN) aprova ona iha pedidu autorizasaun Governu ba transferénsia estraordinária daruak husi Fundu Petrolíferu ho montante millaun $286,8.

Pedidu husi Governu ne’e pasa iha diskusaun finál globál rezultadu votasaun a-favór 43, kontra 0 no abstesaun 18.

“Proposta lei númeru 17/V 2 aprovadu,” deklara Prezidente Parlamentu Nasionál (PPN), Aniceto Guterres, iha sala plenáriu PN, kinta ne’e.

PPN fó sai katak aban Komisaun C ne’ebé trata asuntu Finansa Públika sei finaliza redasaun finál hafoin manda ba Prezidente Repúblika hodi halo promulgasaun.

Nia dehan, tuir lei Xefe Estadu iha tempu atu analiza durante loron 30, maibé ida-ne’e kabe ba Prezidente Repúblika nia kompeténsia.

Iha Proposta orijinál husi Ministériu Finansa, VIII Governu Konstitusionál husu millaun $400 inklui proposta adisionál maibé PN autoriza de’it millaun $286,8

Hosi millaun $286,8 ne’e aloka millaun $216,8 ba  reforsa kofre Estadu hodi finánsia servisu administrasaun públika no millaun $70 antesipa despeza hasoru COVID- 19 inklui rekuperasaun atividade ekonómika.

Prezidente Komisaun C, Maria Angélica Rangel husu ba membru Komisaun C no Ministériu Finansa atu partisipa ativu iha redasaun finál, molok lori ba Xefe Estadu.

Deputada Bankada CNRT, Maria Fernanda Lay, argumenta nia parte vota abstesaun tanba Governu la hatudu dokumentu ba ezekusaun Fundu COVID-19.

“Ha’u hein Governu bele ezekuta ho di’ak no hatudu relatóriu ezekusaun,” tenik Deputada Bankada Opozisaun ne’e.

Deputadu Bankada CNRT, Domigos Coelo husu ba Governu atubele uza osan ne’e hodi selu ema sira ne’ebé servisu iha liña frente.

Enkuantu, Vise Prezidente Bankada CNRT Patrocínio Fernandes, fundamenta razaun nia fó votu abstasaun tanba esplikasaun husi Governu kona-ba ezekusaun Fundu Petrolíferu dahuluk ladún klaru no laiha relatóriu.

Sorin seluk, Deputadu Bankada KHUNTO, Luís Roberto, konsidera nia parte tenke a-favór ba proposta Governu tanba iha nesesidade duni atu Governu foti osan hodi reforsa kaixa tezouru no Fundu COVID-19.

“Bankada KHUNTO hakarak funsionamentu mákina Estadu kontinua la’o maibé husu ba Governua atu ezekuta ho di’ak atu povu ida-ne’e bele hetan benefísiu,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here