Xefe Departamentu Abastesimentu no Água, Francisco Xavier Pereira, halo observasaun ba tanki abastesimentu Bee Moos iha Hera. Imajen/DAA

DILI, 03 agostu 2020 (TATOLI)–Xefe Departamentu Abastesimentu Água Munisípiu Dili, Francisco Xavier Pereira, hateten fornesementu bee-moos ba komunidade iha urbana durante ne’e la’o normál tanba bee hirak ne’ebé mak maihosi sistem rua (2) mak bee sistema gravitasaun no sistema bomba ka bee ne’ebé mak foti hosi rai-okos.

Notísia Relevante: Aldeia Lenuk-Hun no Ailele-Hun La Asesu Bee-Moos

“Durante ne’e abastesiementu água urbana fornese bee-moos ba komunidade la’o normál tanba ita uza sistema bee gravitasaun. Katak, bee foti hosi bee-matan Benamauk, Bee-moos, Bemori no Maloa ninian no suporta mós ho sistema bomba nian ne’ebé mak durante ne’e suporta malu hodi fornese bee-moos ba ita-nia komunidade sira,” dehan Xefe Departamentu Abastesimentu Água Munisípiu Dili, Francisco Xavier Pereira, ba Agência TATOLI iha nia kaar fatin Mascarinhas, Dili, segunda ne’e.

Nia hateten, Abastesimentu Água Munisípiu Dili 75% foti bee iha rai-okos no 25% hosi rai-leten mak hodi fornese ba komunidade sira iha Sidade Dili

Iha área ka aldeia suku balun mak seidauk asesu bee ho di’ak, nia dehan, tanba seidauk instala kanu hosi Diresaun Nasionál Servisu Água (DNSA) nian ba komunidade no balun tanba kanu aat ka feruzen nune’e bele la to’o iha komsumidór sira.

“Ita rekoñese katak fatin balun iha Sidasde Dili seidauk hetan bee-moos tanba kanu seidauk instala hosi DNSA nian no ida seluk mak kanu tohan ka feruzen entaun bee labele auli tuir,” nia dehan

Ho ida ne’e, xefe Abastesimentu ne’e hatutan Aldeia Lenuk-Hun, Ailele-Hun inklui Aldeia Suku-Laran ne’e iha rasik bee-matan maibé iha mudansa klimátiku no kresimentu ekonómiku ho populasaun aumenta entaun bee mós menus ba beibeik.

“Loos duni, bee-matan uluk komunidade sira uza ne’e maran tiha ona. Maibé ita esforsu atu sira mós tenke hetan bee-moos, maibé bee-matan nia degredasaun ka débitu tún ba bebeik, entaun susar. Ami nu’udar responsabilidade uza meiu ida hodi sira asesu bee mak ami uza rezervatóriu ida uluk fábrika Aikamelo nian ne’e mak ami hosi halo instalasaun kanu ba torneira públiku ida nune’e sira bele asesu maibé bee ne’e ladún sufisiente tanba débitu bee tún,” nia hateten. 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here