Xefe Suku Camea, Matos da Costa. Foto TATOLI: Felicidade Ximenes

DILI, 06 jullu 2020 (TATOLI)–Xefe Suku Camea, Matos da Costa, hato’o preokupasaun hosi komunidade sira ba Governu Sekretáriu Estadu Komunikasaun Sosiál (SEKOMS) no Sekretáriu Estadu Arte Kultura (SEAK) bainhira governante ne’e vizita Aldeia Lenuk-Hun.

Notísia Relevante: SECOMS Apresia Komunidade Sira iha Aldeia Lenuk-Hun

“Ami-nia komunidade iha Aldeia Lenuk-Hun no Ailele-Hun la asesu ba bee-moos tanba to’o agor bee mak laiha. Dala ruma iha bailoron, sira susar loos ba bee-moos. Tempu udan, sira konsumu de’it udan-been. Tanba ne’e, husu para atende lai bee ne’e ba aldeia rua ne’e,” dehan Xefe Suku Camea, Matos da Costa, ba jornalsita sira iha Aldeia Lenuk-Hun, segunda ne’e.

Nia dehan, maski autoridae hato’o ona proposta ba parte relevante maibé husu para Governu atu kontinua haforsa povu nia lian no preokupasaun ba to’o iha nasionál hodi oinsá bele aselera prosesu refere.

“Ha’u haruka ona proposta ba parte kompetente maibé aproveita ho exelensia sira-nia prezensa iha povu nia leet ne’e, ami hakarak husu atu haforsa nafatin ami-nia planu proposta ne’ebé mak hato’o ona ba Governu ne’e, atu nune’e ha’u-nia povu mós bele asesu bee-moos ho di’ak,” nia sujere.

Aleinde la asesu bee-moos, nia informa, komunidade sira-nia preokupasaun seluk kona-ba edukasaun, desportu, estrada, no klínika mós sai nafatin kestaun hodi informa ba Governu. 

Xefe suku ne’e informa, iha Aledia Lenuk-Hun xefe família hamutuk 123 no iha Aldeia Ailele-Hun hamutuk xefe família 285 ne’ebé mak durante ne’e la asesu bee-moos.

“Ita-nia aldeia rua, Aldeia Lenuk-Hun ho Aldeia Ailele-Hun mak to’o agora susar atu asesu ba bee-moos. Tanba ne’e, ha’u husu atu haforsa proposta ne’ebé mak ha’u hato’o ona parte Governu liuhosi Servisu Água no Saneamentu (SAS) hodi aselera prosesu ne’e, nune’e ita-nia komunidade sira iha ne’e mós bele asesu,” nia dehan. 

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here