Imajen/Dokumentasaun.

DILI, 31 jullu 2020 (TATLI)—Prezidente Repúblika, Francisco Guterres “Lú Olo”, ohin, oferese karau ida ba komunidade Musulmana ne’ebé selebra loron boot Idul Adha hodi oho no fahe ba viziñu  sira hodi hametin relasaun hosi ema ba ema. 

Notísia Relevante: Selebrasaun Idul Adha, Governu felisita komunidade musulmana

“Oho karau no fahe uitoan-uitoan ba uma-kain viziñu  hatudu jestu rekoñese ema nu’udar ema no haforsa relasaun hosi ema ba ema. Eventu musulmanu ida-ne’e ajuda hanorin daudaun ita-nia ema katak laiha fronteira entre ita ema tanba relijiaun ka diferensa ne’ebé de’it. Idul Adha la´ós de’it festa ida ba fiar-nain Musulmanu maibé atu selebra mós ho bin-maun-alin hotu-hotu ho fiar ne’ebé de’it. Oho karau no fahe uitoan-uitoan ba uma-kain viziñu  hatudu jestu rekoñese ema nu’udar ema no haforsa relasaun hosi ema ba ema,” Mensajen Xefe Estadu ne’ebé leitura hosi Diretór Jerál PR, Domngos Amaral, iha ámbitu loron boot Idul Adha ne’e, iha Meskuita Kampung Alor, Dili, sesta ne’e.

Iha selebrasaun ne’e Prezidensia Repúblika Liuhusi Diretór Jerál entrega mós karau ida nu’udar sentidu solidariedade. Ida-ne’e hahalok boot ida-ne’ebé Prezidente Repúblika valoriza tebe-tebes iha ita-nia sosiedade ohin loron nian.

“Relasaun simu malu mak hakiak pás iha ita ida-idak nia laran no ba ita-nia rai doben Timor-Leste. Simu malu hariku ita ida-idak, nu’udar ema hatene moris hamutuk ho domin, iha diversidade laran. Hakuak boot ba maluk sira hotu,” Xefe Estadu hato’o lia-menon.

Prezidente Repúblika, Francisco Guterres “Lú Olo”, hato’o haksolok ba fiar-na’in musulmanu sira hotu, sidadaun timoroan hela iha Timor-Leste ka iha rai-li’ur. Hato’o mós haksolok ba sidadaun estranjeiru sira ne’ebé selebra Idul Adha, iha rai doben Timor-Leste ka iha nasaun seluk.

Hanesan tinan-tinan maluk  musulmanu sira hakarak tebes selebra hamutuk  data importante ida-ne’e, Idul Adha ka Loron Sakrifísiu hodi fó-hanoin profeta Abrão ninia espíritu sakrifísiu. Liuhosi selebrasaun koletiva ida-ne’e, maluk sira -ne’e haburas ba beibeik fiar musulmanu no solidariedade entre ema.

Vise-Prezidente Komunidade Musulmanu Timor-Leste, Inácio António Soares ho nasaun Musulmana Abdulah, apresia ho Xefe Estadu ne’ebé oferese ona karau ida ba komunidade Musulmana hodi selebra loron boot Idul Adha ne’e.

“Ami orgullu ho Prezidente Repúblika ne’ebé ohin oferese karau ida mai ami. Karau ne’e ami oho no sei fahe ba viziñu sira. Ne’e hodi ita hotu-hotu selebra loron boot Idul Adha ba loron ohin ne’e,” nia dehan.

Tuir observasaun Agência TATOLI iha Meskita Kampung Alor, komunidade Musulmana 400-resin mak selebra loron boot ne’e.

Nune’e mós karau sira-ne’ebé oferese hosi Prezidente Repúblika, Eis Primeiru-Ministru, Mari Alkatiri, no ajénsia internasionál sira hahú oho daudaun hodi oferese ba viziñu sira.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here