Prezidente Repúblika, Francisco Guterres Lú Olo. Imajen António Gonçalves

DILI, 31 jullu 2020 (TATLI)—Prezidente Repúblika (PR), Francisco Guterres “Lú Olo”, husi ba komunidade musulmana atu apoia Governu Timor-Leste liuhosi sensibliza edukasaun ba komunidade hodi kombate propagasaun surtu COVID-19 iha Timor-Leste.

Notísia Relevante: PR oferese karau ba komunidade musulmana selebra Idul Adha

“Ha‘u aproveita festa Idul Adha nian hodi husu ba fiar-nain musulmanu sira atu ajuda autoridade Timor-Leste eduka alin sira atu haktuir nafatin rekomendasaun hosi Ministériu Saúde Timor-Leste hanesan fase- liman beibeik ho sabaun, uza máskara no halo distansiamentu sosiál hodi bele kombate COVID-19 iha Timor-Leste,” Mensajen Xefe Estadu ne’ebé lee sai hosi Diretór Jerál PR, Domingos Amaral, iha ámbitu loron boot Idul Adha iha Meskita Kampu Alor, Dili, sesta ne’e.

Xefe Estadu fó hanoin moras COVID-19 hada’et maka’as hela iha mundu, iha rai barak, serimónia signifikativu  ida-ne’e labele hala’o di’ak tinan ida-ne’e, tuir maluk musulmanu sira-nia hanoin no hakarak.

“Iha ita-nia país viziñu, Indonézia, autoridade  no grupu musulmanu sira husu ba fiar-na’in sira atu hatuir medida ne’ebé Governu foti atu hasees ka kontrola moras COVID-19,” Xefe Estadu akresenta iha nia mensajen ba komunidade musulmana sira.

Ho moras invizivel ne’e, Xefe Estadu hateten, iha área sira-ne’ebé risku aas tebes atu hetan moras COVID-19 hamutuk 33, proibidu halo serimónia relijiozu iha meskita sira.

“Ba área sira seluk, autoridade sira husu ba hotu-hotu atu haktuir protokolu saúde nian. Iha rai Indonézia mate ona ema besik rihun lima tanba COVID-19,” mensajen PR Lú Olo haktuir.

Entretantu, Vise-Prezidente Komunidade Musulmanu Timor-Leste, Inácio António Soares “Abdulah”, hateten maski Timor-Leste seidauk enfrenta moras COVID-19 maibé Timor-Leste tenke prepara-aan ho másimu. 

“Mesmu ita-nia rain seidauk enfrenta COVID-19 maibé ita tenke halo prepara-aan ho másimu, tanba ita la hatene moras ne’e atu mosu hosi ne’ebé rai-maran, tasi ka aéreu. Ami hanesan organizasaun relijoza sei senibiliza medida ne’ebé Governu no Organizasaun Mundiál Saúde fó-sai ona,” dehan Inácio António Soares ba Agência TATOLI, iha Kampun Alor, Dili.

Nia fó hanoin, importante liu mak povu tomak nia preparasaun katak tenke la’o-tuir medida ne’ebé governu anunsia ona no importante liu mak povu tomak iha konsiénsia.

“Ohin, iha selebrasaun Idul Adha ne’e mós sempre fó lembra ba komunidade musulmana tomak atu fase-liman uza sabaun, uza máskara iha fatin ne’ebé de’it tanba razaun prinsipál liu mak ita lahetene moras ne’e mosu hosi ne’ebé,” Vise-Prezidente Komunidade Musulmanu Timor-Leste ne’e fó hanoin.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here