Vise-Prezidente Komunidade Musulmana Timor-Leste, Inácio António Soares. Imajen/Evaristo Soares Martins.

DILI, 31 jullu 2020 (TATLI)—Vise-Prezidente Komunidade Musulmana Timor-Leste, Inácio António Soares, esplika pilár importante 5 (lima) ba komunidade musulmana iha mundu tomak fiar to’o hakotu peregrinasaun iha mundu.

Notísia Relevante: PR Lú Olo husu komunidade musulmana apoia governu kombate COVID-19

“Loron ida ohin hanesan loron boot musulmanu nian hanesan mós ami-nia fé iha pilár lima importante. Primeiru mak ami Shadad (tama no rekoñese hanesan ema musulmana), segundu halo orasaun (Sholat), terseiru tama iha bulan puasa ramadhan (Jejún), kuatru zakat (ismola), lima mak sai haji ne’e mak ohin loron komunidade musulmanu iha mundu tomak selebra ne’e ka bolu naran loron boot Idul Adha ne’e,” dehan Inácio António Soares ne’ebé ho naran Abdulah ne’e ba Agência TATOLI, iha ámbitu selebrasaun loron boot Idul Adha 1441 H iha Meskitu An-Nur, Kampu Alor, Dili, sesta ne’e.

Vise-Prezidente Komunidade Musulmana Timor-Leste ne’e esplika, shadad ne’e kritéria musulmanu ne’ebé iha fiar ba profeta (nabi) Muhammad Saw ho nia eskolante sira.

Nune’e mós, nia esplika, sholat hanesan kritéria musulmana katak prátika sholat tenke banati prosedimentu profeta Muhammad Saw  hanesan figura personifikasaun (pengejawantah)  pedidu hosi Deus (allah) nian. Komunidade musulmana simu orden hodi harii no hato’o orasaun salat (sholat) tanba tuir Surah Al-Ankabut hetan tenke impede hahalok immoral sira.

Ramadhan (jejun), hanesan jejun ne’ebé hala’o iha fulan Ramadhan ne’ebé totál loron entre 29 no 30 iha prosesu jejún ne’e. Tuir doutrina musulmana iha jejun ne’e bele konfesa sala sira-ne’ebé durante sira komete.

Vise-Prezidente ne’e hatutan, zakat (ismola) hanesan  termu obrigatóriu ne’ebé tenke hasai hosi ema ne’ebé nu’udar musulmana ne’ebé sei oferese ba komunidade ne’ebé merese duni atu hetan apoia. Zakat haree hosi língua signifika moos (suci subur).

Abdulah dehan, pilár ikus liu mak haji (ziarah) kada tinan sempre hala’o iha Mekah, Arábita Saudita ne’ebé iha devér ba komunidade musulmana ne’ebé tenke hala’o dala-ida durante sei moris iha mundu. Atividade ne’e sei hahú entre 28 jullu to’o 2 agostu

“Sentidu prinsipál hosi loron boot Idul Adha ne’e hanesan espíritu solidariedade entre komunidade musulmana iha mundu tomak, liuhosi ami-nia doutrina katak ba komunidade sira-ne’ebé iha kapasidade bele sa’e ba Haji, ba sira-ne’ebé seidauk prontu sa’e haji ne’e bele liuhosi hasa’e ofertóriu (kurban) hodi sosa animál hanesan karau no bibi hodi nune’e ami bele halo serimónia iha selebrasaun Idul Adha ne’e,” nia esplika.

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here