Jornalista sira bainhira halo kobertura iha ámbitu luta kontra COVID-19. Imajen Tatoli/Egas Cristovão

DILI, 30 jullu 2020 (TATOLI)-Ministériu Asuntu Parlamentár no Komunikasaun Sosiál (MAPKOMS) hamutuk ho Ministériu Finansa (MF) prepara hela rezolusaun ba suplementu remuneratóriu ba jornalista ne’ebé konsidera iha liña frente hodi presta serbisu iha ámbitu luta kontra surtu COVID-19.

Ministériu rua ne’e presiza tan baze legál tanba iha rezolusaun suplementu remuneratóriu ba profisionál sira ne’ebé dedika-an, ne’ebé antes ne’e aprezenta hosi MF, la mensiona jornalista, maski konsidera serbisu jornalista iha liña frente.

Ministru Asuntu Parlamentár no Komunikasaun Sosiál, Francisco Jerónimo, dehan posibilidade kuandu baze legál rezolvidu ona entre ministériu rua ne’e maka espera katak kuarta semana oin bele aprezenta ona ba Konsellu Ministru (KM) atu deskute.

“Ha’u hanoin sei iha posibilidade bele hotu lalais, kuarta semana-oin ami aprezenta ona,” relata Ministru Francisco, kinta ne’e, iha Balide.

Notísia Relevante: Governu Aprova Suplementu Remuneratóriu ba Profesionál Liña Frente Kada Loron $25

Nia informa, ministériu rua koordena ona hodi halo rezolusaun.

“Ohin loraik ha’u orienta ona ha’u-nia asesór sira ba hasoru asesór Ministériu Finansa nian atubele haree filafali baze legál ne’e. Ami sei ko’alia ho Ministériu Finansa atu aprezenta rezolusaun ne’e hodi bele aprova, nune’e bele fó dalan atu halo pagamentu remunerasaun ba jornalista sira,” nia akresenta.

Governante ne’e haktuir, nia parte ko’alia ona kestaun ne’e iha Konsellu Ministru kuarta horiseik inklui koordena ho MF.

“Sedu ka tarde jornalista sira sei hetan sira-nia  direitu. Horiseik iha Konsellu Ministru mós ha’u ko’alia asuntu ne’e no Ministru Finansa mós hatudu razaun katak presiza baze legál. Ha’u aprezenta ona ba sira katak baze legál depende ba interpretasaun idaidak ninian,” Ministru haktuir.

Parte MAPKOMS halo validasaun ona ba dokumentu ne’ebé mídia sira submete no entrega ona ba MF.

“Hanesan Ministru tutela ba asuntu ida-ne’e, hau’u sei defende nafatin jornalista sira-nia direitu atu hetan neneik ka lalais mós tenke to’o atu hetan,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here