Deputadu Bankada CNRT, Adérito Hugo da Costa. Imajen Tatoli/ Egas Cristóvão

DILI, 30 jullu 2020 (TATOLI)—Membru Parlamentu Nasionál, Deputadu Adérito Hugo da Costa, hateten mekanizmu eleisaun ba reprezentasaun membru Conselho de Imprensa (CI) sei pronúnsia liuhosi plenária molok tama ba diskusaun no votasaun.

Notísia Relevante: PN adia eleisaun ba membru CI tanba ajenda barak 

Deputadu Adérito Hugo da Costa esplika, mekanizmu eleisaun hanesan sei pronunsia plenária tanba prosesu ne’e ita atu hili ema ho votu sekretu.

“Sei tau urna iha oin no bolu deputadu prezente sira ba vota. Agora ein-prinsípiu votasaun bele individu no bele pakote tanba vota ba ema entaun tenke pasa ho maioria absoluta 33 votus ba kualkér kandidatu atu bele pasa. Orsida mak ita sei haree meza atu aprezenta modelu ka mekanizmu eleisaun halo nusá, ne’ebé mekanizmu meza mak sei aprezenta,” Eis jornalista ne’e informa ba Agência TATOLI, iha Parlamentu Nasionál, kinta ne’e.

Tuir nia, ema na’in-rua ne’e parlamentu tenke eleze entaun iha kontekstu ida-ne’e mak bankada parlametár sira loby ba malu oinsá reprezentante parlamentu nian na’in-rua ne’e bele eleze direta.

“Maibé votu mak la atinje 33 signifika tenke tama ba segunda-volta (ronde daruak),” dehan Eis Prezidente Parlamentu Nasionál ne’e.

Nia esplika, iha kompozisaun hosi parlamentu nian ida jurista no ida tenke méritu iha área komunikasaun sosiál.

Entretantu, ideia hosi Deputadu Bankada KHUNTO, António Nobre Tilman, hatete katak deputadu sira sei hili kandidatu hirak-ne’ebé oras ne’e tama ona parlamentu.

“Iha bulletin votu ne’e tau kandidatu sira-nia naran depois deputadu sira hili tuir idak-idak nia kandidatu, ninia mekanizmu ne’e la pakote ida maibé ha’u konfirma lai tanba ida-ne’e primeira vez ba ha’u. Pakote ka la pakote ha’u labele adianta lai,” nia dehan. 

Prosesu dikusaun sei hala’o iha orsida, tuku 15.00 ho kandidatu na’in-haat (4) ne’ebé Bankada parlamentár Congresso Nacional da Reconstrução de Timor (CNRT) propoin Expedito Loro Dias Ximenes, Bankada Frente Revolucionária de Timor-Leste Independente (FRETILIN) mantein Paulo Adriano da Cruz “Hunu Malu”, Bankada Partido Libertação Popular (PLP) propoin Jordão Antero Henrique Marques no Bankada UDT/FM propoin Deonaia da Silva Prego.

Lei Komunikasaun Sosiál artigu 45 kona-ba Kompozisaun Konsellu Imprensa alínea c, hateten sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.

Tuir lei Komuniasaun Sosiál nú 5 /2014, 19 novembru, Kapítulu VII estabelse Konsellu Imprensa (CI-sigla portugés), artigu 42 (Natureza no Independénsia), alínea 1, hateten  Konsellu Imprensa nu’udar entidade administrativu independente no hala’o ninia atribuisaun nomós kompeténsia la haktuir diretrís ka orientasaun sira podér polítiku nian.

Nune’e mós artigu 45 husi Lei Komunikasaun kona-ba Kompozisaun Konsellu Imprensa hamutuk membru na’in-lima, ne’ebé atu hili liuhosi dalan tuir-mai:

  1. a) Reprezentante jornalista na’in-rua ne’ebé sira hili tiha ona liuhosi eleisaun;
  2. b) Reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun;
  3. c) Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.
  4. d) Membru sira Konsellu Imprensa hili entre sira ninia Prezidente.

Artigu 47 husi Lei Komunikasaun Sosiál (Estatutu membru sira-nian) alínea 1 hateten bainhira membru Konsellu Imprensa hala’o knaar sei tau-hamutuk ho ezersísiu atividade profisionál ne’ebé hanesan, sei la selu nein fó subsídiu osan no la iha karatér permanente.

Alínea 2 husi artigu ne’e fundamenta, membru sira Konsellu Imprensa iha direitu ba seña prezensa tuir termu ne’ebé ninia estatutu sei estabelese karik.

Tuir Rejimentu Parlamentu Nasionál (RPN) artigu 69 (Votatasaun nia forma) alíena 1 kona-ba votasaun nia forma sira hanessan tuir mai ne’e:

a. Votasaun ordinária;

b. Votasaun nominal;

c. Votasaun liuhosi ekrutíniu sekretu.

Alinea 2 hosi artigu 69 ne’e La permite votasaun ho aklamasaun.

Ho eleisaun ba Membru Konsellu Imprensa uza RPN artigu 72 (Votasaun liuhosi eskrutíniu sekretu) katak, votasaun liuhosi ekcrutíniu sekretu só bele uza iha eleisaun ka iha deliberaasaun ne’ebé, konforme Rejimento ka Estatutu Deputadu sira-nian, tenke halo tuir forma ne’e, ka wainhira plenáriu delibera, tuir rekerimento husi Deputadu na’in-10.

Purtantu RPN Artigo 73 (Empate iha votasaun) alínea1 hateten, karik votasaun fó rezultado empate, matéria ne’ebé sai nu’udar objetu ba votasaun sei diskute tan molok tau hikas ba votação foun.

Alínea 2 hosi artigu 73 ne’e esplika, empate iha votasaun daruak sei konsidera katak la aprova.

 Jornalista : Evaristo Soares Martins

 Editór        :  Cancio Ximenes

HAKEREK NO HATÁN

Please enter your comment!
Please enter your name here