Plenária Parlamentu Nasionál. Imajen Tatoli/António Gonçalves

DILI, 29 jullu 2020 (TATOLI)—Parlamentu Nasionál kontinua adia eleisaun ba sidadaun na’in-rua ne’ebé ho kapasidade no iha méritu profisionál ho preferénsia ne’ebé hatutan ba komunikasaun sosiál ba Konsellu Imprensa (CI-sigla portugés) tanba ajenda barak tebes maibé sei hala’o eleisaun iha tempu sertu.

Notísia Relevante: PN Sei Hala’o Eleisaun Ba Membru CI, CNRT Propoin Expedito Dias Ximenes

“Kona-ba ajenda hili ema na’in-rua ba Konsellu Imprensa nian kontinua ajenda nafatin no konsideradu hosi Parlamentu Nasionál, maibé la akontese ba orsida lokraik no nein akontese aban maibé momentu sertu sei halo mós eleisaun ba ida-ne’e,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira, hafoin reuniaun líder bankada, iha Parlamentu Nasionál, kuarta ne’e.

Iha ajenda konvokatóriu reuniaun líder bankada ba loron ohin, fiksa hotu eleisaun ba Konsellu Imprensa maibé rezultadu reuniaun entre líder bankada ne’ebé dirije hosi Prezidente Parlamentu Nasionál, Deputadu Aniceto Guterres, la fiksa ajenda ne’e hodi aprezenta ba plenária estraordinária ohin lokraik no aban.

Entretantu, Bankada Parlamentár Congresso Nacional da Reconstrução de Timor (CNRT) propoin ona Expedito Dias Ximenes, Bankada Frente Revolucionária de Timor-Leste Independente (FRETILIN) mantein Paulo Adriano da Cruz, Bankada Partido Libertação Popular (PLP) propoin Jordão Antero Henrique Marques no Bankada UDT/FM propoin Deonaia da Silva Pereira.

Tuir Lei Komunikasaun Sosiál artigu 45 kona-ba Kompozisaun Konsellu Imprensa alínea c, hateten sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.

Iha reuniaun líder bankada ohin, partisipa hosi reprezentasaun Governu nian atuál Sekretáriu Estadu Komunikasaun Sosiál (SEKOMS), Mericio Juvenal Akara.

Tuir lei Komuniasaun Sosiál nú 5 /2014, 19 novembru, Kapítulu VII estabelse Konsellu Imprensa (CI-sigla portugés), artigu 42 (Natureza no Independénsia), alínea 1 hateten  Konsellu Imprensa nu’udar entidade administrativu independente no hala’o ninia atribuisaun nomós kompeténsia la haktuir diretrís ka orientasaun sira podér polítiku nian.

Nune’e mós artigu 45 husi Lei Komunikasaun kona-ba Kompozisaun Konsellu Imprensa hamutuk membru na’in-lima, ne’ebé atu hili liuhosi dalan tuir-mai:

  1. a) Reprezentante jornalista na’in-rua ne’ebé sira hili tiha ona liuhosi eleisaun;
  2. b) Reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun;
  3. c) Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.
  4. d) Membru sira Konsellu Imprensa hili entre sira ninia Prezidente.

Artigu 47 husi Lei Komunikasaun Sosiál (Estatutu membru sira-nian) alínea 1 hateten bainhira membru Konsellu Imprensa hala’o knaar sei tau-hamutuk ho ezersísiu atividade profisionál ne’ebé hanesan, sei la selu nein fó subsídiu osan no la iha karatér permanente.

Alínea 2 husi artigu ne’e fundamenta, membru sira Konsellu Imprensa iha direitu ba seña prezensa tuir termu ne’ebé ninia estatutu sei estabelese karik.

Iha parte seluk, parte Timor-Leste Press Union (TLPU) hili ona hili reprezentasaun jornalista ida, Francisco Belo, ba iha Konsellu Imprensa no Asosiasaun Jornalista Timor-Leste (AJTL) hili ona Virgílio Guterres no hela de’it media na’in sira mak seidauk halo koneferensia.

Sekretáriu Meza Parlamentu Nasionál ne’e fó-sai katak, sei iha plenária estraordinária dala-rua, ohin lokraik no aban.

“Entaun ajenda orsida lokraik nian mak sei halo eleisaun ba Komisáriu Komisaun Funsaun Públika ida, iha tuku 15.00. Aban sei iha ajenda halo aprezentasaun komisaun sira, tuir mai mak halo diskusaun no votasaun faze jeneralidade ba Lei Kódigu Mineiru,” nia dehan.

Ho eleisaun orsida lokraik ne’e, Bankada UDT/FM propoin João Pereira, Bankada FRETILIN propoin Fausto Freiras “Liurai-Tasi” no Bankada KHUNTO propoin João Mestre. Parlamentu Nasionál sei hili ida entre tolu hodi bai ha Komisaun Funsaun Públika.

Ho ajenda hirak ne’e, Deputada Lídia Norberta dehan, ohin no aban seidauk bele hili sidadaun na’in-rua ba Konsellu Imprensa maibé ajenda ne’e kontinua prioritiza nafatin.

Entretantu, iha loron 31 jullu deputadu sira sei hahú resesu durante fulan-ida no tama fali iha 15 setembru 2020.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here