Prezidente Parlamentu Nasional, Aniceto Longuinhos Guterres Lopez, .Imajen/Antonio Goncalves

DILI, 13 jullu 2020 (TATOLI)—Parlamentu Nasionál (PN), ohin, aprova prorrogasaun períodu funsionamentu Parlamentu Nasionál nian to’o 30 jullu, tanba ne’e iha loron 15 fulan-jullu ne’e la konsege resesu tanba iha ajenda importante balu ne’ebé sei pendene.

Votasaun ba projetu deliberasaun prorrogasaun períodu funsionamentu Parlamentu Nasionál até 30 jullu 2020 ne’e, a-favór 51, kontra 0 no abstensaun 2. Ho rezultadu votasaun ne’e aumenta tán funsionamentu parlamentu nian hahú  hosi loron 15 to’o loron 30 jullu (extende semana rua tán) hafoin tama ba resesu.

“Ho nune’e Parlamentu Nasionál delibera ona ba prorrogasaun funsionamentu normál parlamentu nian até dia 30 jullu 2020, ho nia objetivu espesífiku ne’ebé iha deliberasaun nia laran,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, segunda ne’e.

Deputadu Aniceto Guterres hateten, liuhosi loron 30 jullu parlamentu ba nafatin resesu maibé mosu situasaun ruma atu trata ho urjénsia no ejize deputadu sira tenke reuni sei konvoka liuhosi Komisaun Permanente.

Razaun deliberasaun prorrogasaun períudu funsionamentu Parlamentu Nasionál até 30 jullu, tanba serbisu barak sei pendente mak hanesan votasaun finál globál ba Medida Prevensaun no Kombate Korrupsaun (MPCC-sigla portugés), proposta lei protesaun sivíl, diskusaun orsamentu privadu parlamentu nian no ajenda importante balun tán.

Entretantu, Deputadu Bankada FRETILIN, Joaquim dos Santos, konsidera ajenda prorrogasaun ne’e pertinente tanba iha sesaun plenária hamutuk haat (4) tanba lei balun urjente.

“Prezidente, ha’u só autoriza to’o de’it dia 30 jullu, liu ida-ne’e ha’u lakohi tanba tinan rua (2) ita la resesu maibé di’ak ba interese estadu nian, nune’e ita bele finaliza tiha servisu sira-ne’ebé sei pendente,” Deputadu Joaquim dos Santos hateten.

Aleinde ne’e, Deputada Bankada CNRT, Carmelita Caetano Moniz, salienta deputadu sira presiza duni deskansa maibé interese rai ida-ne’e estende tán prosesu resesu to’o loron 30 fulan-jullu.

“Hanesan Prezidente Komisaun A, Deputadu Joaquim dos Santos dehan, liuhosi loron 30 ne’e fó oituan tempu deskansa,” dehan  Deputada Bankada CNRT ne’e.

Tuir Rejimentu Parlamentu Nasionál (RPN) artigu 45 (Sesaun Lejizlativa), alínea 2, períodu normál funsionamentu Parlamentu Nasionál nian hahú iha 15 setembru no ramata iha 15 jullu, sein prejuízu ba períodu suspensun iha Natál entre 23 dezembru no 02 janeiru tinan tuir mai, no suspensaun seluk-seluk ne’ebé Parlamentu delibera liuhosi maioria dois terços hosi Deputadu eleitu sira.

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here