Komandante Jerál PNTL, Komísariu Faustino da Costa. Imajen Tatoli/Egas Cristovão

DILI, 28 jullu 2020 (TATOLI) – Komandante Jerál Polísia Nasionál Timor-Leste (PNTL) Komisáriu Faustino da Costa, no Segundu Komandante PNTL Komisáriu Mateus Fernandes, ohin, halibur poténsia rekursu umanu PNTL nian hosi nasionál to’o munisípiu, inklui unidade hotu ne’ebé pertense ba Komandu Jerál PNTL iha Akademia Polísia, Comoro, Dili, hodi hahú diskute proposta Orsamentu Jerál Estadu (OJE) 2020-2021 ne’ebé sei submete ba Governu liuhosi Ministériu Interiór (MI).

Notísia Relevante : Komisaun B Buka Solusaun Ba PNTL Nia Dívida Millaun $2,7

Komandante Jerál PNTL, Komisáriu Faustino da Costa,  hateten, previzaun PNTL nian ba OJE 2020 sei fó prioridade primeiru liu ba atu selu dívida PNTL nian hosi 2017 to’o 2019 ho montante dívida millaun $2.7.

“Enkontru ne’e atu hato’o ba komandante sira hanesan avaliasaun ida ba servisu sira ne’ebé durante hala’o no depois saida mak komandu fó hanoin atu presiza hadi’a ba oin no mós kestaun orsamentu. Ita boot sira hatene ba polísia ohin hodi fó orientasaun ba orsamentu tinan ne’e saida mak ita hanoin atu halo,” hateten Komisáriu Faustino da Costa, ba jornalista, iha ámbitu sorumutuk ne’e.

Komisáriu Faustino da Costa hateten, planu prioridade boot ba PNTL nian ho orientasaun Vise Ministru Interior (MI) no Primeiru-Ministru (PM) Taur Matan Ruak nian ba iha tinan 2021 mak foku ba Infraestrutura hanesan kria kondisaun fatin ba postu polísia Unidade Patrullamentu  Fronteira (UPF) nune’e mós uma ba ofisiál Polísia Suku (OPS) iha munisípiu sira.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here