Prezidente Komisaun B Parlamentu Nasionál asuntu Defeza, Seguransa no Negósiu Estranjeiru hala’o enkontru ho Komandu PNTL, kinta (09/07/2020). Imajen/Eugénio Pereira

DILI, 09 jullu 2020 (TATOLI) – Komisaun B Parlamentu Nasional ba asuntu Defeza, Seguransa no Negósiu Estranjeiru, ohin, halo audiénsia publika ho Komandu Polísia Nasional Timor-Leste (PNTL) hodi buka solusaun ba dívida millaun $2,7 iha PNTL dezde tinan 2015 to’o 2019.

Notísia Relevante : 2015-2019, PNTL Iha Dívida $2.000,000

Komandu PNTL ho Komisaun B PN halo enkontru hodi buka solusaun ba dívida PNTL nian dezde 2015-2019 ho montante millaun $2,7. Imajen/Eugénio Pereira

Prezidente Komisaun B José Agostinho Sequeira “Somotxo” hamutuk ho membru komisaun sira, inklui Komisáriu Faustino da Costa ho  Komisáriu Mateus Fernandes no ofisiál superiór Komandu PNTL ajusta ona planu orsamentu balun atu trata selu dívida sira ne’e iha proposta Orsamentu Jerál s Estadu (OJE) tinan fiskál 2020 nian.

 Eis Ministru Interiór, José Agostinho Sequeira Somotxo, hafoin audiénsia publika ho Komandu Jerál PNTL ba jornalista iha Kuartél Jerál PNTL, Caicoli, Dili, esplika, nu’udar membru PN iha obrigasaun atu halo enkontru ho komandante PNTL para buka hatene razaun dívida mosu no oinsá Governu selu lalais hodi PNTL prepara fali OJE 2021 nian haree liubá polítika dezenvolvimentu PNTL nian.

Komisaun B mós rekomenda ba Komandu PNTL atu prepara tetu OJE 2020 nian hodi haree liu ba planu prioridade sira ne’ebé importante atu halo ba PNTL.

Tuir planu, Governu sei aprezenta tetu OJE 2020 ba PN iha loron 15 setembru 2020 no kona-ba totál tetu OJE 2021 ba Komandu PNTL nian, Deputadu Somotxo seidauk bele fó sai, tanba sira-nia parte hein proposta hosi Komandu PNTL hodi aprezenta ba Ministériu Interiór.

Iha fatin hanesan Komandante Jerál PNTL, Komisáriu Faustino da Costa, esplika, dívida ne’ebé PNTL iha mai hosi buat rua, hanesan ben servisu ho kapitál menór.

Komandante PNTL ne’e rekoñese dívida sira-ne’e boot tebes, tanba durante ne’e Komandu PNTL halo kontratu ho kompañia ne’ebé halo manutensaun ba transporte PNTL, selu kombustivel no selu Kompañia Telekomunikasaun Telemor ne’ebé halo manutensaun ba kamera CCVT no dívida ba Eletrisidade de Timor-Leste (EDTL) ho seluk tan.

Nia hatutan, dokumentu ba prosesu atu selu dívida sira-ne’e, ekipa Finansa PNTL prepara ona hodi hein OJE 2020 aprova, nune’e Komandu PNTL bele transfere direita ba konta bankária kompañia sira nian.

Notísia Relevante : Taur Husu Selu Lalais Dívida PNTL ho F-FDTL Nian

Jornalista   : Eugénio Pereira

Editór        : Francisco Simões