Provedora Jesuína Maria Ferreira Gomes. Imajen/Portal Ofisiál PDHJ

DILI, 23 jullu 2020 (TATOLI) – Provedora Direitu Umanu no Justisa (PDHJ), Jesuína Maria Ferreira Gomes, husu ba Agêncícia noticiosa de Timor-Leste, Tatoli, Institutu Públiku, atu kontinua hasa’e ka abranje nia kobertura iha area boa-governasaun no direitu umanu.

Notísia Relevante : Agência TATOLI Públika Informasaun ho Kualidade no Kredível

Provedora Jesuína Maria Ferreira Gomes, afirma lia-hirak ne’e hodi hato’o nia  observasaun ba ezisténsia Agêncía Tatoli ne’ebé iha loron 27 jullu 2020, sei komemora nia aniversáriu ba dala-haat.

“Ho dezeju ba Agêncía Tatoli no apresia durante ne’e Tatoli sempre koopera servisu ho PDHJ hodi halo kobertura ba atividade no servisu sira PDHJ nian, tanba ne’e husu atu kontinua hasa’e kobertura iha area boa-governasaun no direitu umanu hodi hatutan informasaun ba públiku,’’ hateten Provedora Jesuína Maria Ferreira Gomes, ohin, iha nia kna’ar fatin Caicoli, Dili.

Tuir nia, durante ne’e Tatoli ladún abranje didi’ak kobertura másimu iha area boa-governasaun no direitu umanu tanba ne’e ba futuru presiza hasae kobertura, ho regulármente ho PDHJ kona-ba servisu monitorizasaun, investigasaun no promosaun.

Jesuína Maria hateten, boa-governasaun presiza promove hodi hasae kobertura, tanba boa-governasaun ne’e envolve autór sira hanesan estadu kompostu hosi PDHJ, CAC, sosiedade sivíl, setór privadu inklui mídia rasik.

“Atividade programa governu sira ne’ebé la’o iha baze ho komunidade sira presiza korrespondénsia Tatoli nian, karik iha irregularidade ruma sira bele hato’o ba mídia nune’e bele o kanaliza ho parte kompetente hanesan PDHJ,’’ nia hateten.

Provedora PDHJ Jesuína Maria Ferreira Gomes, afirma importante tebes promove boa-governasaun liuhosi hasae kobertura hodi hato’o informasaun ba públiku.

“Ida ne’e mak ita bolu kontrolu sosiál hosi komunidade no parte hotu,” tenik nia.

Iha ámbitu komemorasaun aniversáriu Tatoli nian ne’e, Provedora PDHJ, Jesuína Ferreira, husu mídia Estadu ne’e atu kontinua servisu di’ak hodi mellora di’ak liu tan no nafatin transparente, kredibilidade no imparsialidade ba notísia sira ne’ebé fó sai.

“Ha’u akompaña notísia iha Tatoli nia konteúdu intermus estrutura di’ak ona, ho informasaun faktuál, tanba ne’e atu labele lakon konfiansa kontinua mantén imi nia imparsialidade presiza halo verifikasaun  notísia sira nia verasidade rona hosi parte rua antes fó sai nune’e ema bele tau fiar ba Tatoli no labele lakon konfiansa hosi públiku,” Jesuína Maria Ferreira Gomes hatutan.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here