DILI, 22 jullu 2020 (TATOLI)- Komandu Polísia Munisípiu Dili Seksaun Tránzitu detein sidadaun estranjeiru ida ne’ebé kaer pasaporte Repúblika Popular Xina ho inisiál BFS ne’ebé tenta fó subornu ho valor osan $20 ba pesoál Polísia Tránzitu Dili ne’ebé halo pasa revista no halo auto stop ba karreta privadu ida ne’ebé viola sinais tránzitu.
Notísia Relevante : PNTL Sensibiliza Prevensaun Konflitu Ba Estudante UNPAZ
Suspeitu BFS ne’e polísia halo detensaun ba nia no halo mós apreensaun ba nia karreta iha área estrada Ai-mutin, Dili, tersa (21/07), tanba uza karreta privadu Hilux kór mutin ho númeru matrikula A 13-708 TL viola sinais tránzitu
Komandante Polísia Munisipiu Dili, Superintendente Xefe Hendrique da Costa, konsidera aktu sidadaun estranjeiru ho inisiál BFS ne’e komete krime no parte PNTL detein hodi prosesa tuir lei.
“Ita nia ekipa kaptura kedas hodi prosesa nia ba krime ninian, tanba fó osan ba ema ida hanesan korrupsaun ida kontra lei,” dehan Komandante PNTL Dili, Hedrique da Costa, ba jornalista, ohin, iha UNPAZ, Dili.
Komandante Polísia ne’e agradese ba membru PNTL ne’ebé halo servisu hodi kumpre lei no orden.
“Ha’u hato’o agradese no louva ba ita operadór tránzitu sira iha terrenu, tanba polísia tránzitu tenke sai lalenok ba ema seluk hodi kontrola ema labele viola regra sira. Ita polisia simu ona osan hosi Estadu no ita halo atendimentu ba sidadaun hotu-hotu hanesan,” Hendrique da Costa tenik.
Tuir relatóriu investigasaun PNTL nian nota katak, sidadaun Xinés ne’e uza transporte privadu viola regra tránzitu nian, nune’e PNTL halo kedas auto estop, maibé sidadaun Xinés hasai osan tenta fó subornu ba polísia sira ho intensaun atu liberta nia.
Sidadaun Xinés ne’e rasik agora detein hela iha sela Polísia, Caicoli, Dili, hodi hein prosesu investigasaun oras 72 no aprezenta ba Ministériu Públiku.
Jornalista : Eugénio Pereira
Editór : Francisco Simões