Logotipu UNPAZ

DILI, 22 jullu 2020 (TATOLI) – Komandu Polísia Nasionál Timor-Leste (PNTL) Munisípiu Dili koopera ho Universidade da Paz (UNPAZ), ohin, hala’o sensibilizasaun no prevensaun  konflitu ba estudante UNPAZ atu bele hadook-an hosi konflitu no tráfiku droga no tráfiku umanu.

Notísia Relevante : UNPAZ, Paz Fali Ona

Komandante PNTL Munisípiu Dili, Superintendente Xefe Hendrique da Costa. Imajen/Eugénio Pereira

Komandante Polísia Munisípiu Dili, Superintendente Xefe Hendrique da Costa, konsidera, estudante UNPAZ ho total ema liu rihun 10 presiza tebes ambiente paz atu bele fó espasu ba lala’o aprendizajen.

“Ita hatene UNPAZ sai fatin ida di’ak tebe-tebes hodi estudante ho estrutura reitór too funsionáriu sira atu hala’o sira-nia knar. Tanba ne’e presiza ambiente paz no tenke mantein paz,” afirma Komandante Henrique ba jornalista iha UNPAZ, Dili.

Ba estudante hotu, Superintendente Hedrique da Costa dehan, atu garante paz iha ambiente universidade nian, la’ós de’it autoridade polísia, maibé estudante ho sosiedade iha papél importante atu kontribui hametin paz no trankulidade.

Iha parte seluk, PNTL Dili mós sensibiliza matéria prevensaun kona-ba krime droga organizadu ne’ebé ema rai-li’ur bele utiliza Timoroan, tanba ne’e, estudante sira tenke kuidadu-an no hadook-an  hosi ransu livre atu la bele monu ba mundu nakukun nia tentasaun.

 “Ita hatene katak, Timór ne’e sai hanesan ameasa ida ba futuru bele sai mós fatin komérsiu ba droga nian, tanba ne’e ita husu estudante sira atu evita-an,” nia alerta.

Tuir estudu PNTL nian nota, mezmu agora Timor-Leste seidauk sai fatin komérsiu droga nian, maibé ba futuru mafia sira bele uza Timoroan hodi transporta droga hosi nasaun Nijéria, Singapura hodi lori liuhosi Timor-Leste ba fa’an fila-fali ba komersiante sira iha nasaun viziñu Indonézia no Austrália.

PNTL Dili rasik rejista kazu krime droga barak maka akontese iha Timor-Leste maioria joven no kazál Timoroan balun tama komarka iha Dili no iha Atambua- Indonézia tanba sai vítima.

Antes ne’e, Superintendente Xefe, Hendrique da Costa no Segundu Komandante Polísia Munisípiu Dili, Superintendente Asistente Xefe Euclides Belo ho estrutura hala’o ona enkontru ho Arsebispu Metropolitana  Dili, Reitór Universidade Nasional Timor Lorosa’e (UNTL) no estrutura Dili Institute of Technology (DIT)  hodi aprezenta programa servisu hamutuk atu hametin dame iha kapitál Dili.

Magnífiku Reitór Universidade da Paz (UNPAZ), Adolmando Amaral. Imajen/Eugénio Pereira

Iha fatin hanesan, Reitór UNPAZ, Adolmando Soares Amaral, hato’o agradese ba Komandu Polísia Munisipiu Dili ne’ebé kria kooperasaun di’ak tebes ho universidade sira hodi sensibiliza regra no lei sira bele fó mensajen pozitivu ba estudante sira atu evita-an hosi kualkér krime organizadu.

Reitór UNPAZ dehan, ba estudante sira ne’ebé halo estudu iha UNPAZ tenke kaer metin vizaun no misaun UNPAZ nian mak lori povu ba moris ne’ebé modernu,  justu no prosperidade iha paz hodi kumpre mós misaun kria rekursu umanu ne’ebé iha koñesimentu ba siénsia no teknolojia no bele adapta  kona-ba dinámika sósiu no kultura povu Timor-Leste.

Adolmando hatutan, prosesu dezenvolvimentu ba nasaun ida presiza liu maka estabilidade nasionál no prevene krime sira hodi kontribui ba prosesu dezenvolvimentu iha setór hotu-hotu no nia  prioridade maka rekursu umanu.

Jornalista   : Eugénio Pereira 

Editór        : Francisco Simões

HAKEREK NO HATÁN

Please enter your comment!
Please enter your name here