Magnífiku Reitór Universidade da Paz (UNPAZ), Adolmando Amaral. Imajen/Eugénio Pereira

DILI, 08 jullu 2020 (TATOLI)- Hafoin liu fulan balun nia laran prosesu aprendizajen  Universidade da Paz (UNPAZ) la’o iha situasaun trauma no konflitu nia laran hafoin akontese konflitu ne’ebé rezulta juventude ida mate iha arredores UNPAZ nian, ohin loron no ba oin, UNPAZ fila ba paz no hakmatek ona.

Notísia Relevante : UNPAZ “Seidauk iha Paz”, Polísia Monta Seguransa

Magnífiku Reitór UNPAZ, Adolmando Amaral deklara, daudaun ne’e sitasaun atuál iha arredores UNPAZ nian komesa hetan fila fali ona paz hodi fasilita prosesu aprendizajen kontinua la’o normal fila-fali ona.

Adolmando deklara, konflitu ne’ebé akontese iha área UNPAZ hodi rezulta vítima  matebian Hendrique Maia Soares, tinan 21, mate rezolve ona ho parte família sira no parte rua kontinua hein prosesu investigasaun polísia nian ba kazu ne’ebé mosu.

Nia hatutan, konflitu ne’ebé akontese hodi hamosu grupu balun lori foti fatuk tuda hasoru parte dosente hodi rezulta reitór nia ulun rasik kanek, ne’e provoka hosi grupu terseiru ne’ebé hakarak sobu unidade iha UNPAZ nian.

“Situasaun UNPAZ ne’e agora normal hela, soke ema balun maka hakarak hamosu problema boot iha ne’ebá. UNPAZ lakohi atu halo problema tanba UNPAZ agora hakarak hakat ba oin hodi haree liu ba prosesu aprendizajen ba semester I,II too III la’o normál hela,” dehan Reitór UNPAZ Adolmando ba jornalista, ohin, iha Centro Formasaun Polísia Comoro, Dili.

UNPAZ hato’o agradese mós ba parte PNTL ne’ebé kontinua fó seguransa másimu iha arredores UNPAZ hodi hetan fila fali paz no parte UNPAZ rasik kontinua halo nafatin esforsu di’ak hodi hametin kooperasaun dame ho grupu juventude sira.

Jornalista   : Eugénio Pereira

Editór        : Francisco Simões  

HAKEREK NO HATÁN

Please enter your comment!
Please enter your name here