Diretór Ezekutivu Centro Nacional Chega, IP, Hugo Maria Fernandes. Imajen Tatoli/Egas Cristóvão

DILI, 22 jullu 2020 (TATOLI)- Diretór Ezekutivu Centro Nacional Chega (CNC), Hugo Maria Fernandes hateten katak TATOLI nu’udar ajénsia notisioza foun ne’ebé ba Timor Leste, klaru ne’ebé mak hasoru dezafiu barak; primeiru dezafiu mak estabelese nu’udar Agência TATOLI, institusionalmente hasoru dezafiu oioin de’it kona-ba rekursu umanu no seluk tan.

Nia dehan tenke halo nia knaar hanesan ajénsia notisioza ne’ebé mak ibun Estadu Timor nian, em termos de  publikasaun maibé la’ós de’it ba ema Timor Leste maibé ba mós ema Timor iha rai-li’ur inklui ba ema estranjeiru sira.

“Ha’u hanoin aspetu ida ne’e mak, iha tinan haat TATOLI kontinua konsidera katak prosesu ida ne’e mak atu aprende. Ha’u hatete hanesan ne’e, tanba purezemplu, tenke estabelese nia instituisaun, ida seluk mak rekruta jornalista sira, para depois prodús obra jornalístiku sira nian”, Diretór Ezekutivu CNC, Hugo Maria Fernandes hateten ba Agência TATOLI, iha nia servisu fatin Balide, Dili, kuarta ne’e.

Nia dehan iha tinan haat ne’e, konsidera TATOLI hanesan instiuisaun ida ne’ebé mak foin harii nia ai-rin sira.

“Ha’u lakohi hatete katak TATOLI iha ona nia identidade ketak TATOLI foin tinan haat, tanba identidade nu’udar ajénsia notisioza ne’e haree ba produtu ne’ebé mak fó-sai no ha’u haree produtu ne’ebé mak TATOLI fó sai tenke define nia karakter nu’udar ajénsia notisioza nasionál”, tenik nia.

Hugo afirma katak ho ida ne’e mak TATOLI nia produtu sai diferente ho ajénsia notisioza ne’ebé mak la’ós nasionál sira, hanesan mídia online no jornál imprime sira ne’ebé mak mosu barak-barak.

“Entaun iha tinan haat, ha’u hanoin TATOLI internalmente tenke halo reflesaun ida para haree katak sá mak halo kór TATOLI ne’e diferente ho meiu komunikasaun sira seluk, liliu ida ne’ebé online. Diferente iha karakter notísia ka diferente iha nia responsivu liu ba akontesementu ne’ebé mak akontese iha Timor ka nia diferente tanba nia kobertura luan liu. Entaun ho ida ne’e mak  bele define identidade TATOLI nian nu’udar ajénsia notisioza”, Hugo enkoraza.

Relasiona ho aniversáriu TATOLI nian ba da-haat, Diretór Ezekutivu CNC, Hugo Maria Fernandes, fó mensajén ba jornalista TATOLI katak kontinua dezempeña di’ak mak presiza tau-atensaun iha kobertura nian, maibé mensajén mós ba editór sira mak tenke mínimu koñesementu tenke iha tékniku, kompriensaun, no iha sensibilidade kona-ba jornalístiku nian ne’ebé di’ak liu jornalista sira.

Parabéns ba TATOLI. IP, parabéns ba jornalista TATOLI

Notísia relevante:TATOLI Atualiza Informasaun Ida Ne’ebé Mak Atuál No Akurásia

Jornalista       : Osória Marques

Editor             : Rafy Belo

HAKEREK NO HATÁN

Please enter your comment!
Please enter your name here