Prezidente Repúblika (PR), Francisco Guterres Lú Olo, ka'er liman ho Prezidente TR, Deolindo dos Santos iha Palásiu Prezidente Nicolau Lobato. Imajen dok. Tatoli

DILI, 21 jullu 2020 (TATOLI)- Depois de Estadu Emerjénsia (EE), Tribunál móvel funsiona hikas ho nia rezultadu pozitivu tebes, tanba Konsege redús prosesu pendente barak, informasaun ne’e hato’o husi Prezidente Tribunál Rekursu (PTR), Deolindo dos Santos, durante enkontru mensál ho Prezidente Repúblika (PR), Francisco Guterres ‘Lú Olo’, iha palásiu Prezidensiál Bairru-Pité, Dili.

“Fó hatene ba Prezidente Repúblika katak, depois de estadu emerjénsia ne’e, iha fatin balun, espesialmente iha Suai ho Baucau, Tribunál móvel komesa la’o fali ona, ba Viqueque, mai Maliana, komesa la’o fali ona, ho nia rezultadu pozitivu tebes liu-liu iha Baucau, sira ba Vikeke. Prosesu ne’e mak sira lori kuaze hamutuk 50, no finaliza hotu kedan”, Deolindo hateten.

Autoridade másima Tribunál Rekursu ne’e hatutan, iha Maliana sira lori prosesu 50 resin, sira halo kuaze mais de métade prosesu, no iha Maliana sira halo tanba durante estadu emerjénsia iha difikuldade kona-ba dezlokasaun, notifikasaun no seluk tan.

“Ninia rezultadu di’ak no ha’u hato’o ba Prezidente Repúblika. No, ami iha difikuldade ho orsamentu uitoan, maibé, ha’u halo ona pedidu ba Primeiru-Ministru Taur Matan Ruak atu halo ida ne’e hodi apoiu no fasilita liután juis sira atu hahú loron 15 fulan setembru ba oin ho julgamentu movel ne’e bele redús prosesu pendente sira ne’ebé iha”, Deolindo informa.

“Ida ne’e mak ami tenta la’o hela no ha’u mós ba Prezidente Repúblika katak, ami hetan grasa ki’ik-oan ida, ba servisu tribunál nian maka, iha ona nomeasaun ba sekretáriu judisiál sira definitivu nian, ne’ebé maka dezde ukun aan sira ne’ebé maka nomeia uluk ne’e asume kargu ne’e interinu de’it. Tanba sira seidauk priense kritéria balun ne’ebé maka sira-nia estatutu rasik estabelese. Agora daudaun, sira hetan ona momeasaun definitivu, no fó pose ona ba sira. Ne’e signifika katak hahú husi data pose horisehik ba oin, sira asume ona kargu tuir lei ne’ebé estabelese”, nia dehan tan.

“Ida ne’e atu bele fasilita no dudu prosesu sira ne’ebé maka servisu tribunál nian lais liután, tanba bainhira ko’alia kona-ba servisu tribunál nian, la signifika juis sira de’it mak determinante maibé tenke hetan apoiu mós husi parte sekretariadu nian atu nune’e prosesu sira ne’e la’o lais liután,” nia reforsa.

Notísia relevante:TDD Sei Funsiona Hikas Tribunál Movel

Jornalista       : Cipriano Colo

Editór             : Rafy Belo

HAKEREK NO HATÁN

Please enter your comment!
Please enter your name here