Logo Ministériu Saúde.

DILI, 21 jullu 2020 (TATOLI)- Ministra Saúde, Odete Maria Freitas Belo hateten, polítika Ministériu Saúde (MS) nian mak atu re-aloka fali médiku sira ne’ebé mak iha no iha fatin sira ne’ebé mak médiku laiha ne’e. MS tenke halo rekrutramentu ba médiku sira ne’ebé mak termina ona sira-nia estudu.

“Maibé ita labele halo agora tanba ita-nia situasaun ida ne’e la’o ho osan duodésimu nian. Tanba ne’e, ita seidauk bele halo rekrutamentu. Entaun seidauk fó dalan ba ita halo rekrutamentu maibé iha dalan ona atu oinsá mak bele lori ita-nia pesoál saúde sira ne’ebé mak termina ona ne’e, hodi bele hatán ba públiku sira-nia preokupasaun,” Ministra Odete Maria Freitas Belo dehan ba jornalista sira iha Gabinete Vise-Primeiru-Ministru, MSSI, Caicoli, Dili, tersa ne’e.

Governante ne’e relembra katak iha ninia intervensaun dahuluk bainhira simu tomada pose maka sei distribuisaun médiku ba área rurál sira.

“Ami-nia intervensaun dahuluk mak ami hanoin katak atu hadi’a distribuisaun médiku ne’ebé mak konsentra de’it fatin balun maibé ami nota katak iha ami-nia mapa pesoál ne’e iha enfremeiru no médiku sira konsentra ka hala’o servisu de’it iha fatin balun”.

Tuir Ministra Saúde katak bainhira vizita ba sentru saúde balun, iha fatin balun ne’ebé mak médiku no enfremeira sira abondondu servisu .

“Ami parte hosi sentrál tenke haree fila-fali tanba knaar sira ne’e mós la’ós kabe direitamente mai iha Ministériu Saúde maibé kabe kompeténsia ba Prezidente Autoridade no Administradór munisipál sira. Tanba servisu balun hosi Ministériu Saúde ne’e desentraliza ona iha Munisipál sira,” Ministra Odete Maria Freitas Belo akrensenta.

Nia reforsa, bainhira servisu sentru saúde mak la la’o ka abandona ne’e Prezidente Autoridade no Administradór Munisipál mak bele tau-matan no foti asaun ba kestaun ne’e.

Notísia relevante:MS Deside Estende Kontratu ba Pesoál Saúde Sira

Jornalista       : Osória Marques

Editór             : Rafy Belo

HAKEREK NO HATÁN

Please enter your comment!
Please enter your name here