Komísariu CAC, Sergio Hornai. Imajen/António Gonçalves

DILI, 20 jullu 2020 (TATOLI) – Komisáriu Komisaun Anti-Korrupsaun (CAC), Sergio Hornai, apresia ba vontade polítika hosi Parlamentu Nasionál (PN) ne’ebé aprova ona finál globál ba projetu lei númeru 1/V (1a) Medida Prevensaun no Kombate Korrupsaun (MPCC-sigla portugés) ho unanimidade.

Notísia Relevante : PN Aprova Projetu-Lei MPCC ho Unanimidade

“Ho esforsu tomak no vontade polítika mai hosi lejizladór sira ita konsege konklui matéria ida importante tebes ba ita-nia rain liu-liu ba medida prevensaun ba iha kombate kriminalidade korrupsaun,” hateten Komisáriu CAC, Sergio Hornai, ba jornalista, ohin, iha PN.

Nia hateten, CAC nu’udar autoridade responsavel Komisaun Anti-Korrupsaun iha ezersísiu boot ba kontribuisaun elaborasaun lei refere ho entidade tomak estadu nian hanesan Provedoria Direitu Umanu no Justisa (PDHJ), Polísia Sientífika Investigasaun Kriminál (PCIC), Prokuradoria Jerál Repúblika, Defensoria Públika, Ministériu Justisa, no organizasaun naun Governmental Programa Monitorizasaun Sistema Judisiál (JSMP) ho sira seluk tan.

“Hakarak hatete katak ezersísiu ida estraordináriu hatudu ita nia vontade ida boot tebe-tebes oinsá kontribui ba elaborasaun lei anti-korrupsaun ida ne’ebé ohin hetan ona aprovasaun,” dehan Sergio Hornai.

Sergio Hornai hatutan, CAC sei esforsu halo interpretasaun ida ho objetiva tuir lei ne’e nia natureza no espíritu, nune’e bele halo aplikasaun ho efikásia no efisiénsia tuir prinsípiu legalidade.

Nia garante katak ho rekursu ne’ebé daudaun CAC iha sei mellora liu tan hodi bele fó resposta ida di’ak iha futuru no ho lei ne’e la’ós papél CAC nian mesak atu implementa, maibé mai hosi kompromisu Estadu nian tomak atu apoiu hodi halo prevensaun no kombate korrupsaun iha Timor-Leste.

Sergio Hornai hateten, CAC sei halo planeamentu alienasaun ba planu estratéjiku nasionál bele ba tinan lima nian no iha mós planu asaun annual, no ba planu trimestral, atu nune’e, bele orienta iha rekursu finanseiru ida natoon hodi bele halo investimentu hodi forma ema mais kualifikadu, ekipamentu bele operasionaliza servisu sira.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here