DILI, 18 jullu 2020 (TATOLI)–Xefe departamentu Arkivu Centro Nacional Chega (CNC), Aventino de Jesus Baptista Ximenes, hateten durante tinan tolu nia laran CNC la ezekuta deretamente peskiza sira-ne’e maibé maiória ne’e halo parseiru ho entidade sira iha parte peskiza istóriku nian.

Notísia Relevante: CNC Prezerva Memória Pasadu Liuhosi Programa “Komunidade Ida-Istória Ida”

Nia hatutan, kona-ba programa peskiza istóriku ne’e konsege kompleta ona narativu ba mapamentu sítiu istóriku iha munisípiu ne’en (6).  

“Durante tinan tolu nia laran, CNC la ezekuta deretamente peskiza sira-ne’e maibé maiória ne’e halo parseiru ho entidade sira iha parte peskiza istóriku nian. Peskiza istóriku ne’e konsege kompleta ona narativu ba mapamentu sítiu istóriku iha munisípiu ne’en (6) mak Dili, Aileu, Ermera, Ainaro, Manatutu no Baucau,” dehan Aventino de Jesus Baptista Ximenes ba Agência TATOLI iha nia knaar fatin, Antigu Komarka, Balide, Dili, foin lalis ne’e. 

Maibé, nia informa, Munísipiu Baucau seidauk kompletu tanba sei hela Postu Administrativu ida mak seidauk konsege halo, tanba atu kontinua halo kompleta maibé situasaun Estadu Emejénsia entaun la konsege halo iha parte prezervasaun peskiza seluk mós.

Nia hateten, CNC liuhosi divizaun peskiza istóriku estabelese nota intendementu ho Universidade Nasional Timor Leste (UNTL), iha ne’ebá halo ona peskiza ba iha Dili iha suku haat (4) no CNC foti temátiku ida naran komunidade ida-istória ida.

Tuir nia, peskiza ne’e hala’o ho objetivu ida atu bele konsidera ka memorializa kontribuisaun komunidade sira-nian iha prosesu luta libertasaun nasionál hahú hosi 2019.

“Ami halo peskiza, la’ós CNC mak halo maibé CNC halo parseria ho UNTL depois halo mós servisu hamutuk ho autoridade lokál sira, konsege halo peskiza ba iha suku haat iha Dili hanesan Comoro, Bairru Pite, Motael ho Colmera no peskiza ida ne’e agora tama iha faze finalizsaun,” nia dehan.

Iha semana oin, nia haktuir, ekipa hosi universidade sira halo aprezentasaun kona-ba rezultadu peskiza ba tinan 2020, kontinua nafatin ho peskiza istóriku komunidade halo induzaun ona ba iha suku tolu (3). Planu halo ba suku haat (4) hanesan Suku Vila Verde, Lahane Osidentál, Dare inklui mós Suku Becora hafoin halo induzaun iha suku tolu (3).

Nia informa, iha tinan 2018, CNC servisu hamutuk ho peskizadór ho eskritór balun iha asuntu ida-ne’e, serbisu hamutuk ho Padre Martinho Musmão hodi halo peskiza kona-ba pensamentu saudozu Nicolau Lobato nian ne’ebé konsege hotu no livru ne’e lansa tiha ona livru. 

“Ami kontinua fila-fali ho peskiza istóriku sira nian iha tinan kotuk. La’o nafatin ho pesoál eskritór ho peskizadór ho Doutór Aniceto Guru Breteni ne’ebé konsege halo ona pezkisa ba biográfia saudozu Prezidente Francisco Xavier Amaral nian,” nia dehan. 

Centro Nacional Chega! (CNC) nu’udar Institutu Públiku ida ne’ebé estabelese ho Dkretu-lei númeru 48/2016 no tutela diretamente ba Primeiru-Ministru, ho ninia vizaun mak Sosiedade ida ne’ebé inkluzivu, la repete istória pasadu nian hodi promove direitu no valor umanu

Centro Nacional Chega! (CNC) hala’o nia misaun mak harii sentru póz-konflitu ne’ebé prezerva memoria pasadu nian hodi promove direitu no valor umanu no harii parseria Nasionál no Internasional hodi reforsa rede servisu sira atu implementa rekomendasaun sira hosi relatória final Comissão de Acolhimento, verdade e Reconciliação (CAVR) “Chega!” no Comissão da Verdade e Amizade (CVA) “Per Memoriam Ad Spem” sira ne’ebé relevante.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here