ONG nasional Programa Monitorizasaun Sistema Judisiál (JSMP-sigla Ingles) realiza formasaun kona-ba dispozisaun jerál lei kódigu penál ba estudante universidade na’in-70-resin ne’ebé estuda Fakuldade Direitu. Imajen/Nelson de Sousa

DILI, 17 jullu 2020 (TATOLI) – Organizasaun la’ós Governu nian (ONG) Programa Monitorizasaun Sistema Judisiál (JSMP-sigla Ingles), ohin, realiza formasaun kona-ba dispozisaun jerál lei kódigu penál ba estudante universitáriu na’in-70-resin ne’ebé estuda Fakuldade Direitu.

Notísia Reelvante : Paresér JSMP Ba MJ, Kontra Ezbosu Lei Kriminaliza Difamasaun

Formasaun ne’ebé hala’o iha salaun treinamentu JMSP, Manleuana, Dili, ho nia durasaun tempu loron-rua (2), hosi loron 17 to’o loron 18 jullu 2020 ne’ebé sei fahe ba klase rua.

Partisipante formasaun JSMP nian ne’e mai hosi estudante  Universidade Dili, Universidade Nasionál Timor Lorosa’e (UNTL), Universidade da Paz (UNPA) ho Universidade Oriental (UNITAL).

Materia ba formasaun ne’e, formadór sira sei ko’alia kona-ba kódigu prosesu penál foku espesífiku ba prosesu komún no prosesu sumáriu hanesan iha faze inkéritu ka investigasaun, faze julgamentu, faze rekursu no baze ezekusaun ba pena.

Materia seluk mak kódigu penál sei ko’alia kona-ba parte jerál hanesan iha lei penál nia aplikasaun, krime, sirkunstánsia, krime nia konsekuénsia jurídika ho direitu ba keixa.

Juis Konselleiru Tribunál Rekursu (TR) Duarte Tilman ne’ebé loke abertura formasaun ne’e husu formandu sira atu aproveita oportunidade ne’e ho didi’ak hodi bele absorve matéria sira durante formasaun.

“Aprende no aprende ho vontade ne’ebé mak prienxe duni tempu ne’ebé iha,” hateten Juis Konsellu TR Duarte Tilman.

Nia enkoraja estudante hirak ne’e atu estuda maka’as, atu iha futuru bele aplika teoria sira ne’ebé aprende ona hodi kontribui ba dezenvolvimentu nasionál.

Diretora Ezekutivu JSMP Ana Paula Marçal informa, objetivu hosi formasaun ne’e, la sees hosi matéria ne’ebé estudante sira ne’e daudaun aprende hela iha banku universidade, no liuhosi meiu ida ne’e atu bele hasa’e no hakle’an liu tan  sira-nia koñesimentu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here