Jornalista Agência Tatoli, Nelson de Sousa halo entrevista ho Vise Diretór JSMP, Casmito dos Santos, sesta (03/07/2020). Imajen/JSMP

DILI, 03 jullu 2020 (TATOLI) – Organizasaun La’ós Governu nian (ONG)  Programa Monitorizasaun Sistema Judisiál (JSMP, sigla Inglés) kontra inisiativa Governu nian liuhosi Ministeriu Justisa ne’ebé mak atu kriminaliza difamasaun ho baze kria ezbosu Lei Kriminaliza Difamasaun.

Notísia Relevante : Ezbosu Lei Kriminaliza Difamasaun, MJ Sei Estuda Paresér hosi Entidade Sira

Vise Diretór JSMP, Casmiro dos Santos. Imajen/JSMP

Vise Diretór JSMP, Casmiro dos Santos, afirma JSMP kontra ezbosu lei kriminaliza difamasaun, tanba Timor-Leste hanesan nasaun demokrátiku no lei refere kontra prinsípiu Estadu Direitu Demokrátiku.

“Ami hato’o ona paresér ba Ministériu Justisa ho pozisaun klaru katak kontra esforsu Governu nian atu kriminaliza difamasaun,” Casmiro dos Santos, informa  ba Agência Tatoli, ohin, iha nia servisu fatin, Colmera, Dili.

Casmiro hatutan, bainhira lei ne’e avansa ba oin no aprova iha nivel Konsellu Ministru (KM) no iha Parlamentu Nasional (PN), sei la iha vantajen ba povu tanba  lei ne’e atu próteze de’it ukun na’in sira hosi kritika.

“Intensaun hosi Governu nian atu introdús lei ne’e atu eduka sosiedade hodi kriminaliza ema ne’ebé tolok no insultu iha media sosiál Facebook, maibé la presiza tan kria tan lei ne’e, tanba daudaun ne’e difamasaun regula ona iha kódigu sivíl kuandu ema ne’ebé sente ofendidu ba nia onra privasidade lei fó dalan bele lori ba Tribunál,” hateten Casmiro.

Nia haree katak lei kriminaliza difamasaun ne’e kria  vantajen boot hodi hamate dezenvolvimentu demokrasia no labele fó espasu ba ema atu espresa ninia opiniaun ruma hodi proteje de’it ukun nain sira ne’ebé ka’er podér.

“Nune’e bele hamosu ditadura,” afirma Vise Diretór JSMP Casmiro dos Santos, hodi subliña tan katak prinsípiu Estadu Direitu Demokrátiku tenke iha espasu ba ema hotu ezerse ka hato’o sira-nia opiniaun ka kritika ruma ba asaun balun ne’ebé mak la apropriadu ba povu nia interese.

Vise Diretór JSMP ne’e husu atu Ministériu Justisa tenke tetu didi’ak ba iha prosesu tomak, liu-liu oinsá fó espasu ba entidade no públiku hotu atu fó sira-nia opiniaun.

“Ami husu Ministériu Justisa atu kria lei sibernétika hodi regula ema ne’ebé uza identidade falsu hodi tolok no insultu iha media sosiál, la’ós halo lei kriminaliza difamasaun,” afirma Casmiro dos Santos.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here