Koordenadór Fábrika Prosesamentu Kafé no Responsável CCT-Railaco, José Almeida dos Santos. Imajen Tatoli/António Gonçalves

ERMERA, 11 jullu 2020 (TATOLI) – Relasiona ho preokupasaun Agrikultór baunilla Suku Leimea Sorin Balun, Postu Administrativu Hatulia, Munisípiu Ermera kona-ba folin baunilla no husu ba Governu atu define loloos folin ba kada kilograma, maka parte Kooperativa Kafé Timor (CCT, sigla portugés) argumenta katak baunilla ne’ebé sira sosa husi agrikultór bazeia ba folin mundiál.

Koordenadór Fábrika Prosesamentu Kafé no Responsável CCT Railaco, José Almeida dos Santos konfirma katak Governu seidauk define folin buanilla loloos, tanba ne’e maka CCT sosa baunilla bazeia mós ba folin mundiál nian, katak bainhira folin mundiál tun maka sira mós adapta folin ba kada kilograma.

“Loos duni folin buanilla tun, ne’ebé foin lalais ami ba sosa kilograma ida $20 tanba ita adopta sistema merkadu livre, tanba ne’e maka folin tun maka ami mós hatún, satán ita-nia Governu seidauk define loloos folin ba buanilla,” hateten   Koordenadór José Almeida ba Agência Tatoli iha edifísiu CCT, Railaco, Munisípiu Ermera, sesta (10/07).

Nia haktuir, CCT iha tinan 2019 sosa buanilla barak iha Suku Leimea Sorin Balun lori osan $470.000 no momentu ne’ebá folin kilograma ida $57.

Antes ne’e, agrikultór sira konfesa iha vontade di’ak no badinas tebes kuda baunilla maibé folin mak ladún razoável no piór liután iha ámbitu pandemia COVID-19, CCT ne’ebé mak durante ne’e sosa baunilla hatún folin.

Notísia Relavante: Agrikultór Baunilla Ermera Husu Governu Define Folin Kada Kilograma

Responsável CCT-Railaco ne’e dehan, folin ne’ebé CCT estabelese bazeia ba folin mundiál no bainhira tun, kooperativa ne’e la halo manipulasaun iha folin.

Inan feton agrikultór baunilla iha Suku Leimea Sorin Balun, Postu Administrativu Hatulia, Munisípiu Ermera. Imajen Tatoli/António Gonçalves

“Folin ba produtu sira ne’e la permanente, sempre tun no sa’e nune’e de’it, tanba ne’e maka ami la halo manipulasaun ba folin iha rai-laran, maibé bazeia ba gráfika internasionál,” nia subliña.

CCT planea ona sosa baunilla tonelada 13.000 to’o 15.000 hosi komunidade sira.

Tuir José katak daudaun ne’e produsaun baunilla barak liu mak iha Suku Leimea Sorin Balun, Postu Administrativu Hatulia, Munisípiu Ermera.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here