Prezidente Komisan A PB, Deputadu bankada Fretilin, Joaquim dos Santos. Imajen/Egas Cristovão

DILI, 16 jullu 2020 (TATOLI)—Prezidente Komisaun A (Justisa no Konstitusionál), Deputadu Joaquim dos Santos, hateten lei komplementár ne’ebé atu apoia Lei Medida Prevensaun no Kombate Korrupsaun (MPCC-sigla portugés) depende ba vontade membru deputadu sira no membru Governu atu aprezenta proposta-lei no projetu-lei.

 Notísia Relevante: PN Presiza Alista Lei Komplementár Sira Atu Apoia Lei MPCC

“Lei suplementár ka komlementár ne’e depende ba vontade deputadu sira no membru Governu sira tanba tuir Konstituisaun iha podér atu aprezenta proposta-lei no projetu-lei ne’e, deputadu no Governu mak aprezenta. Governu atu implementa lei ne’e presiza norma suplementár ne’e sira tenke lalais halo proposta mai para parlamentu aprova ka deputadu sira mós haree katak para lalais lei ne’e bele implementa, bele aprezenta projetu-lei para aprova lei suplementár ne’e,” dehan Deputadu Joaquim dos Santos ba jornalista sira, iha resintu Parlamentu Nasionál, kinta ne’e.

Prezidente Komisaun A ne’e esplika, lei MPCC ne’e fó tempu atu halo ajustamentu no halo adaptasaun ba preparativu sira molok implementa iha sosiedade.

Nia dehan, lei MPCC ne’e presiza tán lei komplementár tanba Komisaun Antí Korrupsaun (CAC-sigla portugés) nia kompeténsia seidauk regula kona-ba formuláriu órgaun ne’e atu hala’o serbisu investigasaun.

Nune’e mós CAC bele reforsa órgaun seluk nia serbisu hanesan Ministériu Públiku, hanesan tribunál karik, órgaun investigasaun kriminál no autoridade téknika CAC nian, depende subtánsia lei MPCC ne’e haruka hodi hamosu lei suplementár sira.

“Matéria lubuk ida ke presiza reforsa MPCC, kona-ba atu kria mekanismu asesu ba informasaun, iha artigu balun ke husu duni atu halo duni regra komplementár. Ha’u hanoin di’akliu ho lei ka dekretu-lei, maibé lei MPCC ne’e vigora lai mak halo regra komplementár sira,” informa Prezidente Komisaun A.

Nia esplika, bainhira Lei MPCC sei kriminaliza krime korrupsaun ne’ebé foin mosu maibé kona-ba kazu sira antes ne’e depende ba prosesu investigasaun.

“Prosesu kazu ne’ebé la’o tiha ona la’o nafatin, rosesu foun mai lei ne’e kona. Purtantu lei ne’e kona ba oin no kona ba kotuk. Kona-ba prosesu sira antes ne’e depende ba prosesu investigasaun, regra preventiva ne’e iha hotu no regra kriminál ne’e iha hotu, depende ba órgaun autoridade judisiáriu sira atu hala’o sira-nia knaar,” nia dehan. 

Komisaun A mós, ohin,  sei aprova relatóriu no pareser kona-ba projetu-lei Medida Prevensaun no Kombate Korrupsaun.

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here