Diretór Nasionál PCIC, Vicente Fernandes Brito . Imajen/Egas Cristovão

DILI, 14 jullu 2020 (TATOLI)–Diretór Polisia Sientífika Investigasaun Kriminál (PSIK), Vicente Fernandes Brito, fó hanoin nafatin ba Parlamentu Nasionál liuhosi Prezidente Komisaun A, Joaquim dos Santos ‘Boraluli’, atu alista nafatin lei komplementár sira hodi fó apoiu ba lei númeru 1/V/I-Medida Preventiva no Kombate Korrupsaun (MPCC, sigla portugés).

Notísia Relevante: MP Konsidera Sensibilizasaun Lei MPCC Importante ba Ajente Públiku Sira

Vicente Fernandes Brito fó hanoin ne’e, liuhusi intervensaun ikus bainhira konklui no aprova lei númeru 1/V/I-Medida Preventiva no Kombate Korrupsaun, iha espesialidade ne’ebé hala’o iha Mukit Guest House, Aisirimou, Aileu. 

“Fó hanoin nafatin ba Prezidente Komisaun A katak lei komplementár sira ne’e, se bele alista ona. Lei sira ne’ebé mak bele suporta lei Medida Preventiva no Kompate Korrupsaun (MPCC, sigla portugés) nian, atu labele la’o mesak no labele husik CAC la’o mesak no ita sira seluk husik tiha,” Vicente iha ninia intervensaun.

Diretór PSIK ne’e agradese ba Prezidente Komisaun A sesante, deputada Carmelita Caetano Moniz, ne’ebé hosi inísiu konvida PSIK, nune’e mós kontinua ho Prezidente atuál deputadu Joaquim dos Santos.

“Ami bele dehan, ami partisipa desde inísiu no artigu pur artigu ita diskute ho kuidadu loos no pondera buat barak. Ida-ne’e fó ninia efeitu mai ita katak, afinál Lei Antí Corrupção (LAC) ne’e hanesan lei ida determinante tebes. Ita bele konklui katak em termus ita ratifika komisaun CAC, ita avansa uitoan tanba iha lei  ka kuadru legál,” nia hateten.

Nia dehan, hosi ne’e bele agrupa situasaun ida-ne’e ba iha kuadru vontade politika, tanba iha mós kuadru rua maka prevene no kombate korrupsaun.

“Ida-ne’e mak dezafiu. Primeiru, Kuandu ita kria lei ida di’ak, nia konjuga buat barak. Se la’e, ita fila-fali mai kotuk. Segundu, ita labele iha espetativa katak lei ne’e entrada iha vigór iha 2021 no iha tinan 2023 korrupsaun laiha ona. Bele pelu kontráriu, tanba kuadru ida vontade polítika ne’e ita labele sukat. Ohin, Governu ne’e sa’e makaas bainrua Governu seluk sae fali nia bele tun fila-fali. Maibé, letra lei nia fó responsablidade tomak ba iha operadór justisa nian maka CAC, tanba ema sei  haree duni ba CAC,”  diretór ne’e subliña.

Nia haree katak, agora focus ne’e ba iha Parlamentu Nasionál tanba korrupsaun ne’e krime organizadu, iha ne’ebé nia aumenta (plus) brankeamentu.

“Tanba ne’e, ha’u-nia konkluzaun bazea ba diskusaun ne’ebé fó sai hosi deputada Carmelita Monis desde hahú hosi Likisá, Same no iha Aileu, katak ita tenke sukat ita-nia aan. Se lae, ita sei hanesan mós ho lei tráfiku droga nian, kontentór sia ita prende, maibé ita laiha laboratóriu no ita halai ba halai mai loos,” nia fó ezemplu.

Maski nune’e, Vicente mós fó esperansa atu labele dezesperadu, tanba nia fiar ho diskusaun ne’ebé iha, elabora artigu pur artigu kuaze 120, no entidade relevante sira ne’ebé mai partisipa ne’e husik hela servisu.

“Ita sira ne’ebé tuur iha ne’e, hanesan responsabilidade koletiva ida tanba lei ne’e akumula ideias pertinente hosi kooperadór sira, entidade sira hotu mak tau hamutuk iha ne’e. Tanba ne’e, labele husik de’it mak lia menon maibé semana ida ka rua ita malirin fali ona,” Vicente fó hanoin.

Tuir nia, públiku ninia hare agora foku ba CAC katak Lai Antí Corrupção (LAC) anju no bainhira nia mai ona ne’e sei salva ona situsaun ne’e hodi Timor livre ona hosi korrupsaun.

“Hanesan ita hare komentáriu iha mídia katak falta lei CAC, afinál ema ne’ebé halo korrupsaun kastigu hela maibé ita hanoin katak lei CAC ne’e mai buat hotu rezolve ona. Agora ne’e, ita mak tenke esklarese didi’ak ba públiku, aumezmu tempu ita ajuda fali CAC. Tanba CAC la’ós instituisaun ida-ne’ebé hamriik ona tinan 100, ida ne’e ita hotu nia responsabilidade,” Diretór PSIK ne’e subliña.

Projetu Lei Númeru 1/V/I-Medidas Prevensaun no Kombate Korrupsaun, ne’ebé ho Titulu hamutuk tolu (III), Primeiru (I) kona-ba Medida Preventiva Kombate Korrupsaun, Segundu kona-ba Dispozisaun Kriminál, no Tersieru (III) kona-ba Dispozisaun Finál, ho artigu hamutuk 120.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here