Ministru Korodenadór Asuntu Ekonómiku, Joaquim Amaral, Imajen/MKAE

DILI, 15 jullu 2020 (TATOLI) – Ministru Koordenadór Asuntu Ekonómiku, Joaquim Amaral, hateten parte Institutu Apoia Dezenvolvimentu  Emprezariál (IADE) selebra ona akordu ho Banku Nasionál Komérsiu Timor-Leste (BNCTL, sigla portugés) hodi fó apoiu kréditu ba emprezáriu sira ne’ebé durante ne’e tuir ona formasaun emprezariál husi IADE.

“Ida-ne’e atu fasilita emprezáriu sira ne’ebé tuir ona formasaun emprezariál husi IADE, nune’e bainhira ramata ona formasaun no hetan sertifikadu maka bele fasilita kréditu,” dehan Ministru Joaquim ba Agência Tatoli iha Palásiu Governu, kuarta ne’e.

Tuir governante ne’e, akordu ne’e la sita montante hira maka BNCTL atu fó ba emprezáriu sira, maibé akordu ne’e hanesan entendimentu ida atu loke dalan atu emprezáriu sira ne’ebé presiza fundu bele hakbiit sira-nia negósiu ba oin hafoin ramata formasaun emprezariál.

Notísia Relevante: IADE-BNCTL Sei Selebra Akordu Fó Kréditu ba Kliente Ne’ebé Tuir Ona Formasaun Emprezariál

“Asuntu ne’e bele sai matéria ne’ebé bele ajuda sira atu harii sira-nia negósiu, entaun husi ne’e fásil atu banku halo avalia no deside montante ne’ebé maka sira husu depende ba kuantidade atividade no mós natureza atividade,” nia subliña.

Ministru konsidera akordu ne’e nu’udar sinerjia ida atu IADE no BNCT bele servisu hamutuk, atu nune’e bele atrai emprezáriu ki’ik no médiu sira hodi bele aproveita oportunidade hodi tuir treinamentu.

“Ita-nia emprezáriu barak ladún iha interese atu tuir formasaun emprezariál  tanba sira sente katak sira henesan emprezáriu ona sira la presiza tuir formasaun maibé realidade tuir peskiza, empreza ki’ik no médiu sira iha difikuldade halo jestaun ba sira-nia negósiu,” nia akresenta.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here