Ministru Koordenadór Asuntu Ekonómiku, Joaquim Amaral rona hela esplikasaun kona-ba lala’ok servisu IADE husi Diretór Ezekutivu IADE, Filomeno Marcelino Belo, iha Gabinete MKAE, Palásiu Governu, foin lalais ne’e. Imajen/MKAE

DILI, 04 jullu 2020 (TATOLI) – Diretór Ezekutivu Institutu ba Apoiu Dezenvolvimentu Emprezariál (IADE), Filomeno Marcelino Belo hasoru malu ho Ministru Koordenadór Asuntu Ekonómiku, Joaquim Amaral hodi ko’alia kona-ba lala’ok servisu instituisaun ne’e no oinsá bele kontribui ba rekuperasaun ekonómika.

Iha biban ne’e, Diretór ne’e rekomenda ba Ministru Joaquim atu bele iha kooperasaun entre IADE ho Banku Nasionál Komérsiu Timor-Leste (BNCTL, sigla portugés) atu fó kréditu ba emprezáriu sira ne’ebé tuir ona formasaun emprezariál.

“Agora prioridade ba ami maka fasilita apoiu kréditu ba ita-nian emprezáriu sira ne’ebé maka sai ona ami-nia kliente tanba ami iha ona baze dadus, nune’e iha tempu besik ami sei asina akordu ida ho BNCTL atubele fó apoiu kréditu ba kliente ne’ebé durante ne’e IADE fó ona suporta liuhosi treinamentu, akonsellamentu no akompañamentu,” tenik Diretór IADE ba Agência Tatoli hafoin relamata enkontru ho Ministru Joaquim iha Palásiu Governu, foin lalais ne’e.

Nia informa, durante ne’e IADE fó ona formasaun ba emprezáriu kuaze 5.000 iha territóriu tomak husi nível báziku, médiu no avansadu.

“IADE fó formasaun imprezariál ne’ebé ajuda ita-nia emprezáriu, halo kompetisaun planu negósiu inovativu kada tinan, programa planu negósiu, ligasaun negósiu ne’ebé ami halo no mós atividade akosellamentu no akompañamentu ba emprezáriu sira,” nia akresenta.

Iha Sorin seluk, Ministru Joaquim Amaral hateten daudaun ne’e nia parte orienta ona atu halo rekopersaun ekonómika iha rai-laran, tanba ne’e presiza fó kréditu ba emprezáriu sira, nune’e bele halo atividade ekonomia iha rai-laran ho di’ak atu ekonomia Timor-Leste bele iha fali kresimentu hafoin situasaun surtu COVID-19.

“Seitór seluk importante maibé post COVID-19 ha’u hanoin presiza reforsa barak liután iha seitór produtivu no tenke orienta ba setór ne’e,” nia subliña.

Tuir governante ne’e, rekuperasaun ekonómika rasik hanesan programa husi parte Ministériu Koordenadór Asuntu Ekonómiku (MKAE), tanba ne’e sei koordena ho parte BNCTL hodi selebra akordu hodi fó kreditu ba emprezáriu sira.

“Liuhosi eskema kréditu, emprezáriu sira bele asesu atu sira bele halo fali sira-nia atividade ekonomia liuliu haree ba setór produtivu sira hodi aselera prosesu atividade ekonomia iha Timor-Leste,” nia realsa.

Ministru rekoñese, emprezáriu sira iha dezafíu barak kona-ba finansiamentu tanba ne’e presiza rezolve.

“Mekanizmu kréditu atu fó resposta lalais liu ba asuntu ne’e maka IADE sei selebra akodu ho BNCTL atu fó kréditu ba emprezáriu sira ne’ebé hafoin pasa treinamentu husi IADE. Ha’u hanoin akordu ne’e sei realiza iha tempu badak mai,” hateten Joaquim.

Jornalista: Natalino Costa    

Editora: Julia Chatarina

HAKEREK NO HATÁN

Please enter your comment!
Please enter your name here