Reprezentante Ministériu Públiku (MP), Adjuntu Prokuradór Jerál Repúblika, Alfonso Lopez. Imajen/Mídia CAC.

DILI, 14 jullu 2020 (TATOLI)–Ministériu Públiku (MP) liuhosi Adjuntu Prokuradór Jerál Repúblika, Alfonso Lopez, konsidera sonsibilizasaun lei Númeru 1/V/I-Medida Preventiva no Kompate Korrupsaun (MPCC, sigla portugés) importante tebes atu povu bele hatene liuliu ajente públiku sira.

Notísia Relevante: Governu Sei Esforsu Koopera ho Entidade Relevante Sira Atu Kombate Korrupsaun

Adjuntu Prokuradór Jerál Repúblika Alfonso Lopez, hato’o konsiderasaun ne’e iha mensajen ikus, iha diskusaun finál no aprovasaun faze espesialidade  ba lei refere ne’ebé hala’o iha Mukit Guest House, Aisirimou, Aileu.

“Atu implementa ida-ne’e, presiza pontu rua. Ida maka rekursu umanu. Tenke iha formasaun ida-ne’ebé mai duni iha operadór sira justisa nian ho kontinuidade. Depois nia kaer rasik, ne’e mak iha kompeténsia boot tebes. Liuliu ba prevensaun nian no presiza iha sosializasaun ba povu, liuliu ba ajente públiku sira. Pontu segundu mak tenke koloka duni ekipamentu sira iha orsamentu jerál estadu atu nune’e, bainhira entrada iha vigór, bele implementa daudaun,” Alfonso Lopez hato’o iha ninia intervensaun.

Adjuntu ne’e fó hanoin mós kona-ba lei komplementar sira, tanba ida-ne’e liga ho asset jestaun de bens no asset manajement, iha ne’ebé liga metin ho lei kombate korrupsaun ida-nee.

“Bainhira ida-ne’e mak laiha jestaun, entaun ida-ne’e nia efeitu ladún fó benefísiu mai estadu. Ida-ne’e presiza iha konsiderasaun liuliu ba deputadu sira atu bele implemta ida-ne’e,” nia fó hanoin.

Parte Ministériu Públiku konsidera ida-ne’e hanesan marka jornada ida, tanba ohin loron aprova Lai Antí Corrupção (LAC) nian no deside alteira ne’e sai fali Lei Medida Preventiva no Kombate Korrupsaun nian.

“Ami haree katak ida-ne’e mai duni hosi forsa vontade. Hahú kedan hosi deputadu sira espesialmente komisaun A, hahú kedan hosi Prezidente Komisaun A sesante kontinua ho Prezidente atuál, halo reuni esforsau sira ne’e hotu, partilla ideias tuir lei kontraditóriu sira. Maibé ida-ne’e kapaas tebes tanba rezulta aprovasaun Lei Medida Prevensaun Kombate Korrupsaun. Ami konsidera ida-ne’e hanesan pasu dahuluk importante tebes. Maibé pasu tuir fali, povu hotu hein, oinsá mak atu implementa ho rigorozu. Tanba, la’ós ho lei ne’e de’it maibé tenke prevene duni iha termu represaun nian. Ita lori ema sira-ne’e ba kadeia, aumezmu tempu osan sira tenke fia fali mai ba kofre estadu,”  Adjuntu ne’e subliña.

Projetu Lei Númeru 1/V/I-Medidas Prevensaun no Kombate Korrupsaun, ne’ebé ho Titulu hamutuk tolu (III), Primiru (I) kona-ba medidas preventivas Kombate Korrupsaun, Segundu kona-ba Dispozisaun Kriminál, no Tersieru (III) kona-ba Dispozisaun Finál, ho artigu hamutuk 120.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here